AZXEBER.COM xəbər verir ki, tədbirdə Aqrar Sığorta Fondurun İdarə Heyərinin sədri Fuad Sadıqov jurnalistlərin suallarını cavablayıb.
Aqrar sığorta sistemində ekspertlərin Türkiyədən gətirilməsinə cavab olaraq sədr bildirib ki, Azərbaycanda bu sahədə ekspert tapmaq çətindir. O bildirib ki, zamanla bu göstəricilər dəyişəcək və yerli ekspertlərə daha çox üstünlük veriləcək:
"Bu gün Azərbaycanda aqrar sığorta sistemində ekspertlər təəssüflər olsun ki, yoxdur. Bəli, aqronomlarımız, baytarlarımız kifayət qədər var. Ancaq ixtisaslaşmış ekspert tapmaqda çətinlik çəkirik. Xüsusi diqqətə çatdırılası məqamdır ki, 2020-ci ildə biz öz fəaliyyətimizə başlayanda bir nəfər ekspertimiz var idi ki, onu da biz Türkiyədən gətirmişdik. Bu gün isə ekspertlərin sayı 100-ə çatıb. Ekspertlərin sayını artırmaq üçün təlimlər keçirik. Təəssüflər olsun ki, təlim prosesi ilə iş tamamlanmır. Mütləq qaydada təlimi bitirənlər DİM-dən imtahandan keçirlər. İmtahanı keçəndən sonra isə onlara attestasiyadan keçmələrinə dair şəhadətnamə verilir. Proses savad, bilik və təcrübə tələb edir. Buna görə də, başa düşmək olar ki, bu prosesin başa çatması üçün kifayət qədər vaxt lazımdır.
Sədr bildirib ki, ekspertlərə ehtiyac çoxdur:
"Nəticə etibarilə, Azərbaycanda ən azı 700-800 ekspertə ehtiyacımız var. Təəssüf ki, ekspert sayımız 100-ə yaxındır. Hər il ildə 4 dəfə təlim və imtahan təşkil edirik. Türkiyədən ekspertlər gətirilməyinin başlıca səbəbi odur ki, bizim aqrar sığorta sistemimiz bilavasitə Türkiyə və İspaniyanın aqrar sığorta sisteminə əsaslanır. Vəziyyətin düzgün qiymətləndirilməsi, şaxtanın təsirinin görülməsi, nə dərəcə zərər dəyməsi və s. nüansları bilmək uzun müddət təcrübə tələb edir. Bir müddət sonra Türkiyədən gələn ekspertlərin sayının azalmasını görəcəyik”.
Fuad Sadıqov həmçinin qeyd edib ki, müxtəlif bölgələrə göndərilən ekspertlərə günlük 500 manat verilir:
"Xüsusilə vurğulamaq istəyirəm ki, aqrar sığorta ekspertlərinə günlük 500 manat veririk. Bundan əlavə onların yol pulu, otel pulu və digər xərcləri də biz tərəfdən ödənilir. Məsələn, ekspert hər hansı bir təbii fəlakətdən sonra istehsalçının bağına gedir. İlinə 10 milyon manatlıq istehsal həcmi olan bir təsərrüfatda həmin şəxs gedib zərəri müəyyənləşdirməlidir ki, 10 milyonluq məhsulun neçə milyonuna zərər dəyib. Bu işlərinə görə də həmin ekspertlərə yüksək xidmət haqqı ödəyirik. Hətta qeyri-iş günlərində iki qat əməkhaqqı ödəyirik. Bunu da qeyd edim ki, onlar bizim işçilərimiz deyillər. Özəl sektorlarda və holdinqlərdə çalışırlar. Gənc və ya yaşlı olmağından asılı olmayaraq, öz savadına və bacarığına güvənən insanları ekspert olmağa dəvət edirik”.
