Bu ilin yanvar-mart aylarında Azərbaycan 12 min 299 ton ət idxal edib. Dövlət Gömrük Komitəsi bildirib ki, bu həcmdə ətin dəyəri 28 milyon 630 min ABŞ dolları təşkil edib.
Bunlar, ötən ilin eyni dövrü ilə müqayisədə həcm baxımından 410 ton (3,4 %), dəyər baxımından isə 3 min 805 min dollar (15,3 %) çoxdur. Hesabat dövründə ət idxalına çəkilən xərc Azərbaycanın ümumi idxal xərclərinin 0,7 %-ni təşkil edib. 3 ay ərzində Azərbaycan xarici ölkələrlə 9 milyard 407 milyon ABŞ dolları dəyərində ticarət əməliyyatı aparıb. Bu, ötən ilin eyni dövrünə nisbətən 21,9 % azdır.
İqtisadçı ekspert Elşən Bağırzadə AZXEBER.COM-a açıqlamasında bildirib ki, ət idxalının artması ilk növbədə bazarda təklifin artması deməkdir:
"Azərbaycanda ət idxalının artması ilk növbədə bazarda təklifin artması deməkdir. Qısa müddətdə bu tendensiya qiymətlər üzərində sabitləşdirici təsir göstərir, çünki əlavə idxal daxili tələbi qarşılamağa kömək edir və bazarda kəskin bahalaşmanın qarşısını alır. Xüsusilə, yerli istehsalın mövsümi və struktur məhdudiyyətlərlə üzləşdiyi şəraitdə idxal müəyyən mənada "tənzimləyici mexanizm” rolunu oynayır”.
İqtisadçı deyib ki, bu prosesin uzunmüddətli təsirləri daha diqqətlə qiymətləndirilməlidir:
"Bu prosesin uzunmüddətli təsirləri daha diqqətlə qiymətləndirilməlidir. Davamlı idxal artımı yerli istehsalçıların bazar mövqeyini zəiflədə, onların gəlirliliyini azalda və nəticədə investisiya motivasiyasını aşağı sala bilər. Bu isə kənd təsərrüfatında məhsuldarlığın artırılması və modernləşmə proseslərini ləngidə bilər. Digər tərəfdən, ərzaq məhsulları üzrə idxaldan asılılığın artması ölkəni xarici bazarlardakı qiymət dəyişikliklərinə, logistika problemlərinə və valyuta risklərinə daha həssas edir. Bu baxımdan məsələ təkcə qiymət deyil, həm də ərzaq təhlükəsizliyi kontekstində strateji əhəmiyyət daşıyır”.
O qeyd edib ki, burada əsas məsələ düzgün balansı qorumaqdır:
"Burada əsas məsələ idxalı məhdudlaşdırmaq deyil, düzgün balansı qorumaqdır. Dövlət siyasəti qısa müddətdə qiymət sabitliyini təmin etmək üçün idxaldan istifadə etməklə yanaşı, paralel şəkildə yerli istehsalın rəqabət qabiliyyətini artırmağa yönəlməlidir. Xüsusilə yem bazasının inkişafı, texnologiyaların tətbiqi və fermerlərin maliyyə əlçatanlığının yaxşılaşdırılması kimi tədbirlər uzunmüddətli dayanıqlılıq üçün həlledici rol oynayır”.
Şahanə Ziyad
