Müğənni Nura Suri Dənizkənarı Bulvar ərazisində insanların skuterlərdən, velosipedlərdən istifadə etməsindən şikayətlənib.
AZXEBER.COM xəbər verir ki, o, bulvarda rahat gəzməyin mümkün olmadığını deyil:
"Artıq skuterlər, velosipedlər və onları idarə edən, insanların üstünə şütüyən məxluqların əlindən bulvarda addım atmaq mümkün deyil. Bulvarda 1 stəkan çay sata bilməzsiniz, anında gəlib başınızın üstünü kəsdirərlər.
Skuterlər yenə icarəyə verilir (guya qadağan olunmuşdu). Qoyulan qadağa işarələrinə baxan yoxdur. Deməli, Bakıda dənizi zəbt edib pul qazanırlar, hər yerdə pullu plyajlardır, bulvarda kafe əlindən yer yoxdur, bunlar yetməyib, skuterdən də qazanırlar. İnsanlar nə etsin? Bu şəhərdə kasıblar yaşamasın? Bakını Dubay kimi varlılar şəhəri edin, kasıbları göndərin başqa yerdə yaşasınlar. Gündə yolları bağlıyıb, insanlara tıxaclarda saatlarla əziyyət verirsiniz, pulsuz avtomobili heç yerdə saxlaya bilməzsiniz, heç kəs - öz həyətində də (anında "parkovşik” adıyla gəlib, 2 manatınızı alırlar).
Müğənninin şikayəti ilə bağlı Dənizkənarı Bulvar İdarəsinin mətbuat xidmətinin rəhbəri Əfsanə Mehdiyeva AZXEBER.COM-a açıqlama verib.
Qurum rəsmisi söyləyib ki, Dənizkənarı Bulvarda skuterlərə sürət həddi müəyyənləşdirilib, xəbərdarlıq lövhəsi quraşdırılıb:
"Bizə ünvanlanan çoxsaylı müraciətlərdən sonra Dənizkənarı Bulvar idarəsi skuterlərin Milli Parkda hərəkətini məhdudlaşdırdı. Ancaq skuter həvəskarlarının müraciəti dayanmadığına görə Dənizkənarı Bulvar idarəsi yenidən skuterlərin müəyyən şərtlərlə hərəkətini təmin etdi. Skuter sürənlərin də ixtiyarı var ki, Bulvar ərazisində istədikləri kimi istirahətlərini təmin etsinlər.
Bu nöqteyi-nəzərdən ortaq qərar qəbul olundu. Qərara əsəsən, sürət həddini saatda 17 km olmasına, dəniz kənarı zolaq istisna olmaqla, digər ərazilərdə skuterlərin hərəkətinə icazə verildi”.
Əfsanə Mehdiyeva qeyd edib ki, Bulvar ərazisində icarəyə verilən skuterlərin hər birində xüsusi tətbiq var. Bu tətbiqdə skuterlərin hərəkət maşrutu göstərilir:
""Dənizkənarı Bulvarda kənardan gələn skuterlər üçün qadağan edici lövhələr quraşdırılıb ki, hərəkət trayektoriyasını müəyyənləşdirməyə kömək olsun. Nəzarətçilərimiz tövsiyə xarakterli danışıqlar aparır. Dənizkənarı zolaqda skuterləri hərəkət etdirərlərsə, onlara xəbərdarlıq edilir.
Buradan skuter həvəskarlarına müraciət edirik ki, skutertlərdən yalnız onlar üçün ayrılmış ərazidə istifadə etsinlər. Onlar üçün ayrılmış ərazi dedikdə, qadağan olunmuş işarələrə baxıb, skuterlərini həmin ərazidə hərəkət etdirməmələri nəzərdə tutulur. Vətəndaşlar çox məsuliyyətli olsunlar ki, həm skuter sürənlər, həm də digər insanlar normal istirahət edə bilsinlər”.
Şəbnəm Zahir
