Ukrayna Prezident Ofisinin rəhbəri Kirill Budanov Rusiya hərbi kəşfiyyat idarəsinin (QRU) rəhbəri İqor Kostyukov və 3 il əvvəl öldürülən "Vaqner” özəl hərbi şirkətinin təsisçisi Yevgeni Priqojinlə mütəmadi əlaqə qurduğunu bildirib.
Bu barədə "The New York Times" qəzeti Budanova istinadən məlumat yayıb.
Budanovun sözlərinə görə, o, QRU rəhbəri admiral İqor Kostyukovla tez-tez ünsiyyətdə olub. Belə ki, onlar ilk dəfə 2022-ci ildə Türkiyənin vasitəçiliyi ilə Qara Dəniz Taxıl Dəhlizinin açılması ilə bağlı danışıqlar aparıblar.
"Xüsusilə bu illər ərzində hərbi əsirlərlə bağlı məsələdə əhəmiyyətli nəticələr əldə edə bildik”, - Budanov deyib.
O, həmçinin, Yevgeni Priqojinlə mütəmadi olaraq ünsiyyət qurduğunu vurğulayıb. Budanovun sözlərinə görə, onların danışıqları "Vaqner”in 2023-cü ildə Kremlə qarşı qiyamına və Priqojinin ölümünə qədər davam edib.
Qeyd edək ki, Budanov daha əvvəl Ukrayna Müdafiə Nazirliyinin Baş Kəşfiyyat İdarəsinin rəisi vəzifəsində çalışıb.
///apa
