Tanınmış futbolçu, Milli Komandanın keçmiş üzvü Cavid Hüseynov AZXEBER.COM-a müsahibə verib.
Həmin müsahibəni təqdim edirik:
- Millinin keçmiş futbolçusu kimi, millinin son oyunları ilə əlaqədar fikirlərinizi almaq istəyərdik. Son 3 oyunu necə dəyərləndirirsiniz?
- Son üç oyunu götürsək, Lüksemburq komandasına qarşı mən də hamı kimi millimizdən qələbə gözləyirdim. Təəssüflər olsun ki, bu, baş tutmadı. Daha sonra İrlandiya ilə hesabda öndə ola-ola oyun bərabərliklə yekunlaşdı. Buna da çox üzüldük. "Portuqaliya" komandasına qarşı da oynamaq, həqiqətən, həm səfərdə, həm də evdə çox çətindir. Mən sözün əsl mənasında gözləyirdim ki, bu üç oyundan heç olmasa, 4 xal toplayarıq. Amma bu, baş vermədi.
- Nəticələrdə baş məşqçinin taktiki seçimi nə qədər rol oynadı?
- Əlbəttə, hər bir nəticəyə görə baş məşqçi cavabdehdir. Düşünürəm ki, daha yaxşısını edə bilərdi. Düzdür, oyundan sonra bunu demək asandır. Hərçənd, biz onun içində deyilik. Milli komandanın tərkibində oyunçuların hansı səviyyədə olmasını baş məşqçi görür, analiz edir, son olaraq o cavabdehdir. İlk onbirliyi o meydana buraxır. Amma kənardan fikir bildirməli olsaq, zaman-zaman ilk onbirliklə bağlı bir futbolçu kimi mübahisə edərdim. Yenə deyirəm, bu, baş məşqçinin seçimidir. Əgər ona güvənilirsə, o, bugünkü gündə baş məşqçi təyin olunubsa, bütün öhdəliklər də, seçimlər də ona verilir. Bütün nəticədən də o cavabdehdir.
- Millinin son 3 oyundakı nəticələrdə, millinin vaxtilə içində olan biri kimi necə düşünürsünüz, AFFA-nın rolu nə qədərdi?
- Bugünkü gündə milli komandaya yığılan futbolçular öz klublarında yaxşı səviyyədə olan oyunçulardır. İstər hücum planında, istər müdafiə planında bütün üzdə olan futbolçular milli komandaya dəvət alıb. Potensiallı futbolçulardır. Bu komanda ilə də uğur əldə etmək mümkündür. Sadəcə olaraq, davamlı şəkildə işləmək lazımdır. Burada hər birimizin rolu önəmlidir. Biz azarkeş olaraq milli komandaya inanmalıyıq. Burada təkcə AFFA-nın üzərinə yük düşmür, futbolun içərisində olan, futbolla yaşayan hər kəsin üstünə yük düşür. Ancaq əl-ələ verib, milli komandaya inam göstərib yaxşı nəticə gözləmək lazımdır. Mən inanıram ki, yaxın gələcəkdə milli komandamız bunun öhdəsindəm gələcək. Çünki dəfələrlə vurğulayıram ki, indiki futbolçuların potensialına çox inanıram.
- Millinin hazırlıq prosesi hansı səviyyədə təşkil olunur?
- Sözün düzü, bir komandaya təlim-məşq toplanışları lazımdır, onun qidalanması lazımdır, bazası lazımdır. Bu da hərtərəfli olur, millinin təlim-məşq toplanışı həmişə yüksək səviyyədə təşkil olunur. Mərdəkanda yerləşən milli komandanın bazasını götürək, orada hər bir şərait var. Məşq keçmək üçün, futbolçuların özünü yaxşı hiss etməsi üçün hər şey edilir. O ki qaldı təlim-məşq toplanışılarını da biz hər zaman xarici ölkələrdə keçmişik. Çox yüksək səviyyədə olub. Bunu yalan deməyə ehtiyac yoxdur.
Aydın Nuri
