Bəzən bir yanlış qərar, rədd edilən təklif və ya gələcəyin texnologiyasına vaxtında inanmamaq şirkətlərə milyardlarla dollarlıq zərər vura bilir.
AZXEBER.COM biznes tarixinin ən bahalı səhvlərin araşdırıb.
Bu səhvlərdən biri fotoqrafiya nəhəngi Kodak-a məxsusdur. Şirkət ilk rəqəmsal kameranı hazırlasa da, bu texnologiyanın film satışlarını azaldacağını düşünərək layihəni inkişaf etdirmədi. Nəticədə rəqiblər bazarı ələ keçirdi və Kodak maliyyə çətinlikləri səbəbindən 2012-ci ildə iflasdan qorunmaq üçün məhkəməyə müraciət etdi.
Tarixə düşən digər strateji səhvlərdən biri isə Nokia-ya aiddir. Bir vaxtlar mobil telefon bazarının təxminən 40 faizinə nəzarət edən şirkət smartfon inqilabına gec qoşuldu, Android əməliyyat sistemini qəbul etmədi və qısa müddətdə lider mövqeyini itirdi. 2013-cü ildə isə mobil telefon biznesini Microsoft-a satmağa məcbur qaldı.
Yahoo-nun Google-u təxminən 1 milyon dollara almaq imkanından imtina etməsi, Blockbuster-in isə Netflix-i 50 milyon dollara satın almaq təklifini rədd etməsi biznes tarixinin ən böyük buraxılmış fürsətləri hesab olunur. Bu gün Google-un bazar dəyəri 2 trilyon dollardan artıqdır, Netflix isə dünyanın aparıcı yayım platformalarından biridir. Blockbuster isə iflas edib.
Milyardlarla dollarlıq zərərlə nəticələnən qərarlar bununla da bitmir. 2000-ci ildə AOL və Time Warner arasında bağlanan 165 milyard dollarlıq birləşmə gözlənilən nəticəni vermədi və tarixə ən uğursuz korporativ sövdələşmələrdən biri kimi düşdü. Bayer
şirkətinin Monsanto-nu 63 milyard dollara alması isə sonradan minlərlə məhkəmə iddiası və milyardlarla dollarlıq təzminat ödənişi ilə nəticələndi.
Fəridə Əsədzadə
