Azərbaycanın bölgələrində ətin bir kiloqramı 12-13 manatdan 14-15 manata qalxıb. Qeyd edilir ki, bazarlarda mal və quzu ətinin qiymətində 1-2 manat artım var. Bildirilir ki, səbəb fermerlərin diri satılan mal-qaranı baha qiymətə təqdim etməsidir.
İqtisadçı-ekspert Akif Nəsirli AZXEBER.COM-a açıqlamasında ətin qiymətinin səbəblərindən danışıb.
O qeyd ki, ətin qiymətinin bahalaşmasında maya dəyəri ilə bağlı səbəblər var:
"Ətin qiymətinin bahalaşmasının həm ümumi, həm də bir başa bu sektorun özü ilə bağlı səbəbləri var. Yəni ətin birbaşa maya dəyəri ilə bağlı səbəblər var. Ümumi səbəb ondan ibarətdir ki, bazarda ümumi qiymətlərdə artım var. Yanvar ayı ərzində ərzaq məhsullarının qiyməti də artıb. Bu qiymət artımı fonunda ətin qiymətinin sabit qalması mümkün deyil.
Çünki ət satan da bizim alver etdiyimiz bazarlarda, marketlərdə öz ailəsi üçün, biznesi üçün alış-veriş edir. Bu, onun yaşayış və biznes xərclərini artırır. Ona görə də, o da məcburdur ki, ətin qiymətini bahalaşdırsın. Yəni ətin maya dəyərinə ümumi bazarın təsiri altında təzyiq var”.
Ekspert qeyd edib ki, qış fəslində otun qiymətinin artması da ətin qiymətinə təsir edib:
"Digər tərəfdən, indi qış fəslidir, ötən ilin yayında ot tədarükü azalıb. Otun ən məhsuldar biçini olan birinci biçin 40-50 faiz itkiyə gedib, ziyanvericilərin hücumuna məruz qalıb. 100 faiz birinci biçini götürsək, onun bütün illərdə olduğunun 60 faizi həcmində fermerlər ot tədarükü edə biliblər. Bu da birinci biçin dövründə bir kip otun 5 manata qədər bahalaşması ilə müşahidə olundu. Növbəti biçinlər bunu bir qədər konpensasiya etdi və bir kipin qiyməti 3-4 minat civarında sabitləşdi. Hazırda yonca kipinin qiyməti 7-8 manatdır. Yəni bu yaydakından iki dəfədən də çox baha qiymətdir və ətin qiymətinə təsir edir”.
"Ümumiləşdirsək, ətin qiymətinin bahalaşmasına təsir edən amil bazardakı ümumi bahalaşmadır, bir də birbaşa ətin maya dəyərinə təsir edən otun, yemin bahalaşmasıdır. O ki qaldı yazda yeni mövsüm başlayanda ucuzlaşmasına, mən düşünmürəm ki, yazda və ya yayda ətin uzuclaşsın. Çünki qeyd edilənlərin fonunda ətin qiymətinin yenidən ucuzlaşmasını gözləmək lazım deyil”, - deyə A.Nəsirli əlavə edib.
Aydın Nuri
