"Bildiyiniz kimi, Yeni Kaledoniyada insanların hüquqları pozulur. Fransa tərəfindən buradakı vətəndaşlara qarşı güc tətbiq edilir".
Bu sözləri AZXEBER.COM-a açıqlamasında Milli Məclisin deputatı Naqif Həmzəyev Fransanın Yeni Kaledoniyada tətbiq etdiyi müstəmləkəçilik siyasətində ndanışarkən söyləyib.
Deputatın fikrincə, 21-ci əsrdə Fransa tərəfindən müstəmləkə siyasətinin həyata keçirilməsi qəbuledilməzdir:
"Təəssüflər olsun ki, onların vətəndaşlıq və suverenlik hüquqları əllərindən alınıb. 21-ci əsrdə Fransa tərəfindən müstəmləkə siyasətin həyata keçirilməsi qəbuledilməzdir. Azərbaycan Qoşulmama Hərəkatına rəhbərlik etdiyi dönəmdə məhz bu cür halların qarşısını almaq üçün neokolonial qarşı səylərin birləşdirilməsi üçün dəfələrlə təkidlərlə çıxış etdi. Fransanı və digər müstəmləkə siyasət həyata keçirən dövlətləri 21-ci əsrdə fərqli mövqe ortaya qoymağa çağırırdı. Xüsusilə də Fransanın bu cür hallara qarşı daha liberal münasibət sərgiləməsi, o cümlədən müstəmləkə siyasətindən əl çəkməsinin yaxşı olacağını dilə gətirdi. Düşünürəm ki, hazırda Makron hökuməti tərəfindən Yeni Kaledoniyada törədilən vəhşiliklər cinayətdir və bu birbaşa olaraq insan haqlarının pozulmasının əsas faktlarından biridir. Başqa ölkələrə gedib, insanların haqlarının pozulmasını monitorinq etməyə ehtiyac da yoxdur. Faktiki olaraq, burada baş verənlər misli görünməmiş vəhşilikdir, insan haqlarının kobud şəkildə pozulmasıdır".
Deputat hesab edir ki, Fransanın Daxili İşlər Nazirinin törədilən bu əməllərə haqq qazandırmaq üçün Azərbaycanı günahlandırması yersiz və əsassızdır:
"Hesab edirəm ki, Fransanın Daxili İşlər Naziri Jerard Darmaninin də törədilən bu əməllərə haqq qazandırmaq üçün başqa dövlətləri, o cümlədən Azərbaycanı günahlandırması yersizdir və əsassızdır. Onlar insanların haqlarını pozurlarsa və biz də bunun müdafiəsindən danışırıqsa, Fransa bu məsələdən dərs çıxarmalıdır. İnsanların hüquqlarını bərpa etmək lazımdır və onlara hörmət edilməlidir. Güman edirəm ki, biz bundan sonra da Fransanın bu uğursuz daxili və xarici siyasətinin iç üzlərini açmağa davam etməliyik. Çalışmalıyıq ki, bütün dünya bu ölkənin əsl simasını görsün. Fransa müstəmləkəçilik, soyqırımı siyasətindən əl çəkməlidir. Bu ölkə bu günə qədər törətdiyi soyqırımlara görə həmin ölkələrin vətəndaşlarından, dövlətlərdən, ümumən bəşəriyyətdən üzr istəməlidir".
Mikayıl Mirzəzadə
