İyul ayının 15-dən 18-dək davam edən “Gənc Jurnalistlərin Yeni Media Məktəbi” başa çatdı. Media Məktəbi Bakı şəhəri Divan Express otelində Azərbaycan Respublikası Prezidenti yanında Gənclər Fondunun dəstəyi və Azəri Gənclər Alyansı İctimai Birliyinin təşkilatçılığı ilə həyata keçib.
“Gənc Jurnalistlərin Yeni Media Məktəb”ində birinci gün Gənclər Fondunun layihələr və regionlarla iş sektorunun müdiri Vaqif Seyidbəyov, Mətbuat Şurasının sədri Əflatun Amaşov, BDU-nun professoru, İctimai Teleradio şurasının sədri Cahagir Məmmədli, BAMF sədri, Prezident yanında KİV-in inkişafına Dövlət Dəstəyi Fondunun Şura sədri Umud Mirzəyev gənc jurnalistlərə və layihənin təşkilatçılarına uğurlar arzuladılar.Tədbirin sonrakı sessiyalarında “Baymedia” İnternet portalının rəhbəri Elçin Mirzəbəyli, “Day.az” və “Trend” Media şirkətlərinin direktor müavini Sevda Həmidova, Orta Asiya və Güney Qafqaz Söz Azadlığı Şəbəkəsinin rəhbəri Azər Həsrət, “Caspian Barrel” online jurnalının baş redaktoru İlham Şaban ekspert qismində çıxış etdilər.
Məktəbin ikinci günü Orta Asiya və Güney Qafqaz Söz Azadlığı Şəbəkəsinin rəhbəri Azər Həsrət “Yeni media və cəmiyyət problemlərinin çözüm yolları”, Ortaq Dəyərlər İctimai Birliyinin sədri, “Türküstan” qəzetinin baş redaktoru Aqil Camal “Onlayn mediada etik kodeksin problemləri”,“Kanal 13” İnternet TV-nin rəhbəri Anar Orucov “İnternet televiziya və radionun inkişaf dinamikası, ölkəmizdə bu sahədəki durum” mövzusunda sessiya keçirib.Ekspertlər iştirakçıların yeni media ilə bağlı çoxsaylı suallarını da cavablandırıblar.
“Gənc Jurnalistlərin Yeni Media Məktəbi”nin üçüncü günü isə Demokratik Jurnalistlər Liqasinin sədri Yadigar Məmmədlinin moderatorluğu ilə “Azxeber.com” internet portalının rəhbəri Hacıbəy Heydərli “İnternet medianın sosial şəbəkələrdə rolu” mövzusunda, “Aznews” internet portalının rəhbəri Elçin Zahiroğlu “Onlayn mediada ilkin mənbədən informasiya əldə etmək imkanları” mövzusunda, Jurnalist Ekspert Mərkəzinin rəhbəri Ceyhun Musaoğlu isə “Yeni media və vətəndaş cəmiyyəti” mövzusunda çıxış edib.İyul ayının 18-i məktəbin sonuncu günündə “Klassik jurnalistika yeni mediadan necə yararlana bilər?” mövzusunda “Xəzər” TV-nin müxbiri Yelena Siderenko və Bakı Media Məktəbinin əməkdaşı Aynur Elgünəş çıxış edərək, gənc jurnalistlərlə maraqlı müzakirələr aparıb.Sonrakı sessiyalarda Jurnalist Araşdırmaları Mərkəzinin rəhbəri Seymur Verdizadə, Yeni Media Jurnalistləri icimai birliyinin sədri Xaqani Səfəroğlu və “Aktual.az” internet portalının rəhbəri Anar Yusifoğlu yeni medianın inkişaf dinamikası və internet portallarındakı mövcud durum mövzularında çıxış edərək, gənc jurnalistlərlə geniş müzakirələr aparıb.
Tədbirib sonunda təşkilatçı Leyla Məmmədli cıxış edərək Azərbaycan Respublikası Prezidenti yanında Gənclər Fonduna layihəyə maliyyə dəstəyi göstərdiyinə, gənclərə isə göstərdikləri fəallığa və marağa görə dərin təşəkkürünü bildirib, onları gələcək layihələrdə də fəal iştirak etməyə dəvət edib.Sonda 100-ə yaxın iştirakçıya sertifikatlar təqdim edilib və xatirə şəkilləri çəkilib.
