"Gündə ən azı 2 litr su için”. Bu tövsiyə illərdir həm həkimlərin, həm də sağlam həyat tərzi ilə bağlı məsləhətlərin ayrılmaz hissəsinə çevrilib. Hətta bir çox insan gün ərzində neçə stəkan su içdiyini xüsusi olaraq izləyir.
Bəs hamının qəbul etdiyi bu "2 litr” qaydası doğrudanmı elmi fakta əsaslanır?
AZXEBER.COM xəbər verir ki, mütəxəssislərin bir hissəsi hesab edir ki, "2 litr” ifadəsi zamanla yanlış formada ümumiləşdirilib. Çünki gündəlik maye ehtiyacı hər bir insan üçün fərqlidir və buna yaş, cins, bədən çəkisi, fiziki aktivlik, iqlim şəraiti, hətta qəbul edilən qidalar da təsir göstərir.
Əslində orqanizm mayeni yalnız sudan almır. Meyvə və tərəvəzlər, şorbalar, süd, çay və digər içkilər də gündəlik maye balansına töhfə verir. Məsələn, qarpızın təxminən 90 faizindən çoxu, xiyarın isə təxminən 95 faizi sudan ibarətdir.
Müxtəlif beynəlxalq səhiyyə qurumlarının tövsiyələrinə əsasən, sağlam yetkin şəxslər üçün gündəlik maye ehtiyacı orta hesabla qadınlarda təxminən 2,7 litr, kişilərdə isə 3,7 litr hesab edilir. Lakin bu göstəriciyə yalnız içilən su deyil, qidalardan və digər içkilərdən alınan maye də daxildir. Bu səbəbdən hər kəsin əlavə olaraq mütləq 2 litr su içməsi zəruri hesab edilmir.
İsti hava şəraiti, idman, ağır fiziki əmək, yüksək hərarət və ya bəzi xəstəliklər zamanı isə orqanizmin mayeyə tələbatı artır. Əksinə, müəyyən böyrək və ürək xəstəlikləri zamanı həddindən artıq su qəbulu təhlükəli ola bilər və maye miqdarı məhdudlaşdırıla bilər.
Maraqlı məqamlardan biri də odur ki, son illər sosial şəbəkələrdə "nə qədər çox su içsən, bir o qədər sağlam olarsan” kimi iddialar geniş yayılsa da, elmi araşdırmalar bunu təsdiqləmir. Həddindən artıq su qəbulu nadir hallarda olsa da, qanda natrium səviyyəsinin təhlükəli dərəcədə azalmasına (hiponatremiya) səbəb ola bilər. Bu vəziyyət xüsusilə qısa müddətdə çox böyük həcmdə su qəbul edildikdə yaranır.
Mütəxəssislər bildirirlər ki, orqanizmin susuz qalmamasını təmin etməyin ən sadə yolu susuzluq hissinə diqqət yetirmək və sidiyin rəngini izləməkdir. Açıq sarı rəng adətən kifayət qədər maye qəbulunun göstəricisi sayılır.
Şahanə
