Son vaxtlar infarkt səbəbindən dünyasını dəyişənlərin sayı artmaqdadır. Dünən 49 yaşlı Cabir İmanov da infarkt nəticəsində vəfat edib.
Həkimlər bildirirlər ki, infarkt artıq gənc yaşlarda da müşahidə olunur və bu səbəbdən "gəncləşmiş” xəstəlik kimi qiymətləndirilir.
Kardioloq Sevinc Quliyeva AZXEBER.COM-a açıqlamasında bildirib ki, gənclər səhhətlərini yoxlamadan ağır idman rejimi götürürlər:
"İdman zallarında heç vaxt nə kardioloqdan, nə də terapevtdən istifadə olunduğunu eşitməmişəm. Bizə xəstələr müraciət edərkən ilk olaraq onların kardioloji vəziyyətini, qandakı xolesterin səviyyəsini öyrənir, daha sonra qaçışa icazə veririk. Müayinə etmədən qaçışa icazə verən həkimlər təcrübəsizdir.
İdman zalına gələn insanlardan heç vaxt sağlamlıq haqqında arayış tələb olunmur. Sadəcə olaraq müəyyən dərəcədə hovuzlara gedəndə göbələk xəstəliyinin olmaması ilə bağlı sənəd istənilir. Amma yüngül atletika salonlarında heç bir müayinə kağızı tələb edilmir”.
Həkim deyib ki, infarktın digər səbəbləri isə yağlı yeməklər və hərəkətsizlikdir:
"İnsanlar daha çox hərəkət etməlidirlər. Eyni zamanda stressdən uzaq olmaq vacibdir. Sosial şəbəkələrdən çox istifadə belə stressə səbəb olur. İnsanlar bacarmadıqları yükləri üzərlərinə götürürlər – məsələn, ailə məsuliyyəti, ağır iş və sair. Hər kəs bahalı həyat yaşamaq üçün ağır yükün altına girir. Bundan başqa, insanlar siqaretdən də uzaq durmalıdırlar. Siqaret çəkən insanla çəkməyən arasında çox böyük fərq var”.
"Televiziya, radio, sosial şəbəkələr və məktəblərdə bu barədə maarifləndirici təbliğatlar olmalıdır”-, kardioloq qeyd edib.
Şahanə Ziyad
