Xəbər verdiyimiz kimi, İran xarici işlər naziri Abbas Əraqçi dekabrın 7-i Azərbaycana səfər edəcək.
Səfər çərçivəsində onun Azərbaycan xarici işlər naziri Ceyhun Bayramov və digər bir sıra rəsmilərlə görüşü nəzərdə tutulur.
Orta Doğu Araşdırmalar Mərkəzinin rəhbəri, siyasi şərhçi Sədrəddin Soltan AZXEBER.COM-a açıqlamasında deyib ki, bu səfər iki ölkə arasında münasibətlərin normallaşması istiqamətində növbəti addımdır:
"İranın xarici işlər naziri Abbas Əraqçinin Azərbaycana nəzərdə tutulan səfəri iki ölkə arasında münasibətlərin normallaşması istiqamətində növbəti cəhddir.
Son zamanlar hər iki ölkə arasında bir sıra istiqamətlərdə əlaqələrin inkişaf etdirilməsi və əməkdaşlığın genişləndirilməsinə dair görüşlər keçirilib. İran Prezidenti Məsud Pezeşkianın Azərbaycan Respublikasına səfəri, burada dövlət başçısı Prezident İlham Əliyevlə keçirdiyi görüşlər və digər məsələlər iki ölkə arasında əməkdaşlıq və münasibətlərin normallaşması istiqamətində atılmış addımlardır”.
Ekspert deyib ki, 12 günlük müharibə səbəbindən müəyyən hadisələrin təxirə salındı:
"Məsud Pezeşkian Bakıya səfəri zamanı yenidən gələcəyini də bildirmişdi. Sadəcə olaraq 12 günlük müharibə səbəbindən müəyyən hadisələrin təxirə salındı. Hesab edirəm ki, Əraqçinin Azərbaycana səfəri Pezeşkianın gələcəkdə Bakıya edəcəyi səfər üçün bir hazırlıq və ya bir anons xarakteri daşıyır”.
Şahanə Ziyad
