Xəbər verdiyimiz kimi, Azərbaycan Respublikasının ərazisində praktik tibb fəaliyyəti ilə məşğul olan plastik cərrahlar peşə fəaliyyətinin qanuna uyğunluğunu təsdiq edən sənədlərinin notariat qaydasında təsdiq edilmiş surətlərini (baza ali tibb təhsili, diplomdan sonrakı təhsilə aid bütün sənədlər, əmək kitabçası, tibbi fəaliyyət ilə məşğul olmağa buraxılma barədə şəhadətnamə, sertifikasiya şəhadətnaməsi və s.) 2025-ci il 31 yanvar tarixinədək Azərbaycan Respublikasının Səhiyyə Nazirliyinə şəxsən təqdim etməlidirlər.
Plastik cərrahların peşə fəaliyyətinin qanuna uyğunluğunu təsdiq edən sənədlərin qəbulunun bitməsinə sayılı günlər qalıb.
Bəs, sənədlərini təqdim etməyən həkimlər fəaliyyətlərini necə davam etdirəcəklər?
Məsələ ilə bağlı tibb elmləri doktoru, professor Adil Qeybulla AZXEBER.COM-a açıqlamasında bildirib ki, mövzu Azərbaycansayağı həll edilərsə, bu işin real nəticəsi olmayacaq:
"Məsələnin bu cür həllini düzgün saymıram. Düşünürəm ki, akkreditasiya sistemi qurulmalıdır. Akkreditasiya sistemi olmadan yenə də burada subyektiv faktorlar, müxtəlif neqativ hallar baş alıb gedəcək. Bu sistemlə plastik cərrahlara konkret müddət üçün lisenziya verilməli, müddət bitdikdən sonra lisenziya yenidən yoxlanılıb, tənzimlənməlidir. Dünyada bu işlər belə həll olunur. Bizdə də məsələ bu cür həll olunmayıb, Azərbaycansayağı həll olunsa, bu işin real nəticəsi olmayacaq".
Qeyd edək ki, vətəndaşlardan daxil olan çoxsaylı şikayətləri nəzərə alaraq ölkə ərazisində praktik tibb fəaliyyəti ilə məşğul olan plastik cərrahların peşə fəaliyyətinin qanuni əsaslarının müəyyənləşdirilməsi məqsədilə Azərbaycan Respublikası Səhiyyə Nazirinin müvafiq əmri ilə Azərbaycan Respublikası Səhiyyə Nazirliyinin, Azərbaycan Respublikası Baş Prokurorluğunun, Azərbaycan Respublikası Daxili İşlər Nazirliyinin və Azərbaycan Respublikası Elm və Təhsil Nazirliyinin səlahiyyətli nümayəndələrindən ibarət Xüsusi Təftiş Komissiyası yaradılıb.
Günel Hüseynli
