Noyabrın 25-də AMEA-nın İ.Nəsimi adına Dilçilik İnstitutunda Qazaxıstan Təhsil və Elm Nazirliyinin A.Baytursunov adına Dilçilik İnstitutunun əməkdaşları ilə görüş keçirilib.
Azərbaycan Milli Elmlər Akademiyasının (AMEA) Dilçilik İnstitutu Mətbuat Xidmətindən AZXEBER.COM-a verilən məlumata görə, İ.Nəsimi adına Dilçilik İnstitutunun direktoru, filologiya üzrə elmlər doktoru, professor Fəxrəddin Veysəlli qonaqları səmimi salamlayıb, başçılıq etdiyi institutun fəaliyyəti haqqında onlara bilgi verib.
Qonaqların gəlişi latın qrafikasına keçmək istəyən qardaş Qazaxıstan respublikasının bu sahədə Azərbaycanın təcrübəsini öyrənməsi ilə bağlıdır.
Yeddi nəfərdən ibarət nümayəndə heyətinə A.Baytursunov adına Dilçilik İnstitutunun şöbə müdiri, Beynəlxalq “Qazax Dili” Cəmiyyətinin prezidenti, akademik Umirzak Aitbayev, həmin institutun şöbə müdiri, filologiya elmləri doktoru, prof. A.Jbanov, filologiya elmləri doktoru, prof. A.Jnasbəyov, adıçəkilən institutun direktoru, filologiya elmləri doktoru, prof. M.Malbakov və başqaları daxildirlər.Görüşdə qazaxıstanlı dilçilər azərbaycanlı həmkarlarına dilçiliyə aid dəyərli ədəbiyyatlar hədiyyə ediblər.
Sonra qonaqlar İ.Nəsimi adına Dilçilik İnstitutunda şöbələrin fəaliyyəti ilə yaxından tanış olublar.
Qazaxıstanlı dilçilər həftənin sonuna kimi ölkəmizdə olacaqlar.
