Bu gün Vaşinqtonda ABŞ Dövlət Departamentinin ənənəvi media brifinqi keçirilib. Tədbirdə ABŞ Dövlət Departamentinin mətbuat katibinin müavini Tommy Pigott yerli və xarici jurnalistlərin aktual mövzularla bağlı suallarını cavablandırıb.
AZXEBER.COM xəbər verir ki, brifinqdə iştirak edən jurnalist və hüquq müdafiəçisi Əhməd Şahidov Rusiya-Ukrayna müharibəsi ilə bağlı sual ünvanlayıb. O, ABŞ Prezidenti Donald Trampın Rusiya Prezidenti Vladimir Putinə verdiyi 50 günlük atəşkəs möhlətini 10 günə endirməsini xatırladaraq bildirib ki, Rusiya demək olar ki, hər gün yeni şəhər və qəsəbələri işğal edir və bu, Moskvanın sülh niyyətinə dair ciddi suallar doğurur.
Əhməd Şahidovun sualı belə olub: "ABŞ Prezidenti Donald Tramp Vladimir Putinlə atəşkəs razılaşması üçün nəzərdə tutulmuş 50 günlük müddəti 10 günə endirib və əgər nəticə olmasa, sərt sanksiyalar tətbiq ediləcəyi ilə bağlı xəbərdarlıq edib. Lakin eyni zamanda görürük ki, Rusiya demək olar ki, hər gün yeni şəhər və qəsəbələri zəbt etməkdə davam edir. Bu isə Rusiyanın real niyyətinə dair şübhələr yaradır. Sizcə, bu addım real sülh danışıqlarına səbəb ola bilərmi, yoxsa bu, sadəcə siyasi təzyiq vasitəsidir? Və əgər Rusiya atəşkəs çağırışlarını görməzlikdən gəlib hücumlarını davam etdirsə, nəticələri nə olacaq?”
ABŞ Dövlət Departamentinin baş sözçü müavini Tommy Pigott suala cavabında bildirib ki, ABŞ prezidentin verəcəyi konkret qərarlar barədə əvvəlcədən fikir bildirmək istəməzdi, lakin Trampın və Dövlət katibi Marko Rubionun bu məsələ ilə bağlı mövqeləri kifayət qədər aydındır: "Biz Rusiya rəhbərliyinin sözlərlə deyil, əməllərlə hərəkət etdiyini görmək istəyirik. Prezident bu barədə danışıb və o, möhlətin irəli çəkilməsi qərarını da bu kontekstdə açıqlayıb,” – deyə Pigott bildirib.
ABŞ Dövlət Departamentinin rəsmisi əlavə edib ki, ABŞ-ın əsas məqsədi bu qanlı münaqişəyə son qoymaq və uzunmüddətli sülhə nail olmaqdır: "Biz istəyirik ki, tərəflər danışıqlar masasına əyləşsin, atəşkəsə dair ciddi müzakirələr başlasın və bu proses davamlı və qalıcı sülhə gətirib çıxarsın. Bizim əsas prinsipimiz qan tökülməsinin qarşısını almaqdır və bütün səylərimiz buna yönəlib. Bu, bizim siyasətimizdir və dəyişməz qalır.”
