"Böyük Atatürkün ideyaları qardaş Türkiyənin inkişafının təməlində dayanıb".
Bunu Milli Məclisin sədri Sahibə Qafarova Türkiyə Respublikasının yaradılmasının 102-ci ildönümü münasibətilə Gülüstan sarayında keçirilən tədbirdə çıxışı zamanı deyib.
Spiker bildirib ki, Türkiyə Respublikası Prezident Rəcəb Tayyib Ərdoğanın rəhbərliyi altında sürətli inkişaf yolunu seçib:
"Ankara dünyanın bir çox regionlarında münaqişələrin həllində aparıcı rol oynayır. Türkiyə dünyanın aparıcı iqtisadiyyatlarında öz əhəmiyyətli yerini tutur. Türkiyə qitələri birləşdirən nəqliyyat, logistika qovşağı rolunu oynayır. Azərbaycan və Türkiyə hər zaman bir-birinin yanında olublar. Bundan sonra da belə davam edəcək. Qardaş Türkiyə xalqına firavanlıq arzu edirəm", - deyə sədr bildirib.
S.Qafarova əlavə edib ki, Azərbaycan qardaş ölkənin uğurlarına öz uğurları kimi sevinir: "Ulu öndər Heydər Əliyevin ifadə etdiyi kimi, Azərbaycanla Türkiyə "bir millət - iki dövlət"dir. Ölkələrimizin dostluq və qardaşlıq münasibətləri ortaq köklərimizdən və milli-mənəvi dəyərlərimizdən güc alır, qarşılıqlı hörmət və etimada əsaslanır. Şuşa Bəyannaməsi iki ölkə arasındakı münasibətləri ən yüksək zirvəyə - müttəfiqlik səviyyəsinə yüksəldib. Müxtəlif sahələrdə iş birliyimiz dostluq və qardaşlıq münasibətlərimizi daha da möhkəmləndirir, xalqlarımızın rifahına və tərəqqisinə xidmət edir. Birgə strateji layihələrimiz Cənubi Qafqaz bölgəsinin sülh, sabitlik və əməkdaşlıq məkanına çevrilməsində mühüm rol oynayır. Azərbaycan Respublikasının Prezidenti İlham Əliyevin sözləri ilə deyilsə, "dünyada ikinci belə ölkələr yoxdur ki, bir-birinə bu qədər bağlı olsunlar".
Milli Məclisin sədri vurğulayıb ki, Azərbaycan və Türkiyə beynəlxalq məsələlərdə daim eyni mövqedən çıxış edirlər:
"Türk Dövlətləri Təşkilatında birgə fəaliyyət isə türk birliyinin möhkəmlənməsinə dəyərli töhfələr verir. 44 günlük Vətən müharibəsində Türkiyənin Azərbaycanın yanında olmasını xalqımız heç zaman unutmayacaq. Türkiyə Respublikasının Prezidenti Rəcəb Tayyib Ərdoğan başda olmaqla bütün Türkiyənin verdiyi siyasi və mənəvi dəstək, türk xalqının tutduğu qəti mövqe Azərbaycan torpaqlarının işğalına son qoyulmasında önəmli rol oynayıb. Bu gün Türkiyə Qarabağda və Şərqi Zəngəzurda aparılan bərpa-quruculuq işlərində və digər məsələlərdə də Azərbaycanın yanında yer alır. Mən əminəm ki, Azərbaycanla Türkiyənin birlik və bərabərliyi qarşıdakı illərdə xalqlarımıza yeni-yeni uğurlar gətirəcək".
