Bu gün AzTV-də yayımlanan "Hədəf” verilişinin qonağı olan politoloq İlyas Hüseynov bildirib ki, artıq ənənə halını alan 3-cü Şuşa Qlobal Media Forumu həm nəticələri, həm də gündəmə gətirdiyi məsələlərlə geniş müzakirələrə səbəb olub.
AZXEBER.COM xəbər verir ki, politoloqun sözlərinə görə, forumda səsləndirilən fikirlər və irəli sürülən tezislər təkcə regional deyil, həm də qlobal əhəmiyyət daşıyır:
"Forumun mühüm cəhətlərindən biri də odur ki, jurnalistlər cənab Prezidentə birbaşa sual vermək imkanı əldə edirlər. Eyni zamanda, ötən bir il ərzində həm Cənubi Qafqazda, həm də daha geniş coğrafiyada baş verən proseslər müzakirə mövzusu olur. Xüsusilə Ermənistan-Azərbaycan sülh prosesi və Əbu Dabi görüşündən sonrakı mərhələ diqqət mərkəzində idi”.
İlyas Hüseynov Əbu Dabi görüşünün önəmini vurğulayaraq bildirib ki, həm nümayəndə heyətləri arasında, həm də liderlər arasında təkbətək görüşlər baş tutub.
"Əsas diqqətçəkən məqam liderlərin təkbətək görüşü və burada müzakirə olunan məsələlərdir. Cənab Prezident də çıxışında bu görüşə toxunaraq qeyd etdi ki, ictimaiyyətlər arasında inamın azlığı sülhə mənfi təsir göstərir. Bu da başadüşüləndir. Müharibələrdən sonra sülhə dair yetkin və təmkinli yanaşma formalaşmalıdır və bu da qarşılıqlı etimada əsaslanmalıdır”.
Politoloqun fikrincə, sülh prosesində ikitərəfli format daha səmərəli və dayanıqlıdır:
"Əgər Sülh Müqaviləsinin maddələri ikitərəfli formatda razılaşdırılıb paraflanarsa və Ermənistan Azərbaycanın haqlı tələblərini yerinə yetirərsə, bu, Ermənistan daxilində sülhə mane olan qüvvələrin neytrallaşdırılmasına zəmin yaradacaq”.
O, əlavə edib ki, Azərbaycan heç bir beynəlxalq zəmanət mexanizminə ehtiyac duymur:
"Hər hansı dövlətin zəmanətçi kimi prosesə qoşulması onun Cənubi Qafqazda maraqlarının təmini anlamına gəlir. Bizə ATƏT-in Minsk Qrupu kimi səmərəsiz, nəticəsiz formatlar lazım deyil”.
İlyas Hüseynov qeyd edib ki, Əbu Dabi görüşündən sonra Azərbaycan və Ermənistan tərəfindən yayılan press-relizlərdə fikir uyğunluğu müşahidə olunur:
"Bu, çox önəmlidir. Çünki əvvəllər bu cür yanaşma müşahidə olunmurdu. Ermənistan rəhbərliyi isə ictimaiyyətə yanlış təsəvvürlər təqdim etməyə çalışırdı. Halbuki danışıqlar reallığı tam fərqli idi”.
Politoloq vurğulayıb ki, fundamental məsələlər – o cümlədən Ermənistan Konstitusiyasında dəyişikliklərin edilməsi və Minsk Qrupunun fəaliyyətinə son qoyulması – sülh üçün zəruri şərtlərdir:
"Əgər Ermənistan bu addımları atmırsa, bu, onun sülhdə maraqlı olmadığını göstərir. Prezident İlham Əliyevin dəfələrlə vurğuladığı kimi, bu məsələlər dəmir-beton hüquqi baza ilə təsbit olunmalıdır ki, gələcəkdə revanşizm meyillərinə son qoyulsun”.
Sonda İlyas Hüseynov qeyd edib ki, sülhün möhkəmləndirilməsi, hüquqi zəminə oturdulması gələcək nəsillər üçün sabitlik və təhlükəsizlik təmin edəcək:
"Cənab Prezident konfliktin fəlsəfəsini və həll yollarını ortaya qoyaraq bu məsuliyyəti öz üzərinə götürüb. Bu gün isə sülhün dayanıqlı şəkildə təmin olunması zəruridir və bunu Azərbaycan xalqı milli liderinin rəhbərliyi ilə həyata keçirməlidir”.
Oksana Orucova
