Xəbər verdiyimiz kimi, müğənni İlkin Fuadın ailəsində faciə yaşanıb. Müğənninin anası və nənəsi dəm qazından zəhərlənərək yaşadıqları evdə vəfat ediblər.
Müğənni Respublika Təcili və Təxirəsalınmaz Tibbi Yardım əməkdaşlarının hadisə yerinə vaxtında gəlmədiyi üçün bu faciənin baş verdiyini bildirib.
AZXEBER.COM məsələ ilə bağlı TƏBİB ilə əlaqə saxlayıb.
Qurumdan verilən açıqlamaya görə, əraziyə ilk çağırış 23.19-da olub və 23.30-da Təcili və Təxirəsalınmaz Tibbi Yardım briqadası hadisə yerində olub:
"Respublika Təcili və Təxirəsalınmaz Tibbi Yardım Mərkəzinə 25.02.2025-ci il tarixində saat 23:12-də Xəzər rayonu, Buzovna qəsəbəsi, Ayna Sultanova ərazisindən 2 nəfərin (qadın cinsli) dəm qazından zəhərlənmə şübhəsilə çağırış daxil olub.
Çağırış saat 23:19-da ilk azad təcili tibbi yardım briqadasına ötürülüb. 23:30-da briqada artıq ərazidə olub, çağırış ünvanın qeyri-dəqiqliyi və çağırış üçün qeyd olunan kontaktla əlaqə yaratmaq mümkün olmadığı üçün ünvanı tapmaqda çətinlik yaranıb. Buna baxmayaraq, saat 23:36-da briqada hadisə yerinə çatıb.
Təcili tibbi yardım briqadası tərəfindən 2 şəxsin (qadın cinsli) həkiməqədər ölüm faktı qeydə alınıb. Lakin ünvanda olan şəxslərin təkidi ilə briqada ölüm faktı qeydə alınan şəxslərdən birini (1962-ci il təvəllüdlü) Kliniki Tibbi Mərkəzin Toksikologiya şöbəsinə hospitalizasiya edib. Tibb müəssisəsində də şəxsin ölüm faktı təsdiq olunub.
Meyitlər hüquq-mühafizə orqanlarının müşaiyyəti ilə morqa təhvil verilib".
Günel Hüseynli
