Sosial şəbəkədə yayılan görüntülərdə Yardımlıda yaşayan vətəndaşlar təcili tibbi yardımdan şikayət edib.
AZXEBER.COM xəbər verir ki, yayılan görüntülərdə vətəndaş təcili yardım çağırmasına baxmayaraq çağırışa gələn maşının olmadığını bildirir.
Təcili tibbi yardım mərkəzinə gələn vətəndaş tibb işçilərinin iş yerində olduğunu, ancaq çağırışa gəlməyib xəstəni ora gətirməyini istədiyini bildirir.
TƏBİB-dən baş verən hadisə ilə bağlı AZXEBER.COM- a verilən açıqlamaya görə, təcili tibbi yardım stansiyaları, bölmələri və filiallarının həyətində ambulansların park vəziyyətində olması onların xidmətə cəlb olunmasının mümkünlüyü anlamına gəlmir:
"Təcili tibbi yardım xidməti - xüsusi hazırlıq keçən mütəxəssislərdən ibarət və müasir tibb avadanlıqlarla təchiz olunmuş, əhaliyə xəstəxanayaqədər mərhələdə (hadisə yerində və təxliyə zamanı), tibb müəssisələrində təcili və təxirəsalınmaz tibbi yardım göstərən şəbəkədir. Təcili tibbi yardım stansiyaları, bölmələri və filiallarının həyətində ambulansların park vəziyyətində olması onların xidmətə cəlb olunmasının mümkünlüyü anlamına gəlmir. Çünki ambulanslar texniki vasitələrdir, onların çağırışa yollanması üçün yüksəkixtisaslı həkim, tibb bacısı və ilkin təcili yardım təlimi almış sürücüdən ibarət təcili tibbi yardım briqadası formalaşmalıdır. Yəni təcili tibbi yardıma müraciət daxil olduqda çağırış ünvanına yollanacaq ambulans tibbi və texniki baxımdan komplektləşdirilməlidir. Digər bir halda xidmətdən kənar ambulanslar təcili tibbi yardım stansiyaları, bölmələri və filiallarının həyətində park olunur”.
TƏBİB-dən verilən açıqlamada həmçinin bildirilib ki, çağırış daxil olan zaman ad və soyad təqdim olunmayıb:
"07.03.2025-ci il tarixində saat 15:30 radələrində Respublika Təcili və Təxirəsalınmaz Tibbi Yardım Mərkəzinə Yardımlı rayonu ərazisindən çağırış səbəbi, ünvan, ad və soyad təqdim olunmadan zəng daxil olub.
Zəngin qeydə alındığı vaxt həmin ərazi üzrə çağırış sayı çox olub və bütün briqadalar çağırışların icrasında olub. Saat 15:30 radələrində daxil olan zəngdən təxminən 10 dəqiqə sonra videonu qeydə alan şəxs Yardımlı rayonu üzrə təcili tibbi yardım stansiyasına gəlib. Saat 15:40 radələrində isə digər çağırışdan azad olan və stansiyaya həmin şəxslə eyni anda daxil olan briqada vətəndaşa çağırış ünvanına gedə biləcəklərini bildirib. Buna baxmayaraq, vətəndaş qəbul etməyib və çağırışın imtinası qeydə alınıb.
Həmin şəxsin saat 16:48-də arterial təzyiqin qalxması səbəbilə valideyni üçün (anası) yenidən müraciəti qəbul edilib.
Çağırış ünvanına təcili tibbi yardım briqadası cəlb olunub və yerində tibbi xidmət göstərilib”.
Günel Hüseynli
