Sabuçu rayonu, Ramana-Şuşa qəsəbəsi yolunda yaranan iri çuxura düşən avtomobilə ciddi ziyan dəyib.
Bu barədə həmin avtomobilin sahibi Nihad Əsədov "Xəzər Xəbər”ə müraciət edib.
Xezerxeber.az-ın məlumatına görə, Nihad Əsədov qeyd edib ki, bu gün səhər saatlarında Ramana-Şuşa qəsəbəsi yolu istiqamətində hərəkət edərkən iri çuxura düşüb, nəticədə idarə etdiyi nəqliyyat vasitəsinə ciddi ziyan dəyib.
Sürücü bildirir ki, bu yol aeroport istiqamətindən Zabrat qəsəbəsinədək uzanır və bir neçə yaşayış məntəqəsini birləşdirir. Lakin yolda işıqlandırmanın olmaması, eləcə də təhlükəsizlik tədbirlərinin görülməməsi sürücülər üçün vəziyyəti daha da çətinləşdirir.
Ərazidə yaşayan sakinlərin sözlərinə görə, dərin çuxurları xüsusilə yağışlı havalarda görmək olmur və dəfələrlə yol-nəqliyyat hadisələrinin baş verməsinə səbəb olub.
Məsələ ilə bağlı Sabunçu Rayon İcra Hakimiyyətindən "Xəzər Xəbər”ə bildirildi ki, Ramana qəsəbəsində qəsəbədaxili yolların asfaltlanmasını mərkəzləşmiş qaydada Avtomobil Yolları Dövlət Agentliyi dövlət investisiya proqramları çərçivəsində həyata keçirir. Ramana qəsəbəsi, 30-cu Ramana küçəsində də yolların təmiri ilə bağlı tədbirlərin dövlət investisiya proqramına əlavə edilməsi üçün Sabunçu Rayon İcra Hakimiyyəti tərəfindən aidiyyəti üzrə məktubla müraciət olunub.
