Xəbər verdiyimiz kimi, maliyyə qurumlarının elektron pul köçürmələri barədə məlumatı Maliyyə Monitorinqi Xidmətinə təqdim etməsi qaydasında dəyişiklik edilib.
Yeni qaydaya əsasən, oktyabrın 1-dən etibarən bir təqvim ili ərzində elektron pul köçürmələrinin ümumi məbləği 20 min manata çatdıqdan sonra müştərinin həyata keçirəcəyi növbəti elektron köçürmələr barədə məlumat Maliyyə Monitorinqi Xidmətinə təqdim ediləcək.
Dəyişikliyin böyük məbləğdə və mütəmadi pul köçürən vətəndaşların maliyyə əməliyyatlarına, eləcə də bank xidmətlərindən istifadə davranışına necə təsir edəcəyi maraq doğurur.
Mövzu ilə bağlı AZXEBER.COM-a danışan iqtisadçı Günay Hüseynova bildirib ki, pul köçürmələrinə nəzarətin gücləndirilməsi çirkli pulların dövriyyədən çıxarılması və vergidən yayınmanın qarşısının alınması məqsədi daşıyır.
"Pul köçürmələrinə tətbiq olunan limit və ya bu əməliyyatlara xüsusi nəzarətin olması çirkli pulların dövriyyədən çıxarılması və vergidən yayınmanın qarşısının alınması məqsədi daşıyır.
Vətəndaşların gündəlik maliyyə əməliyyatları və bank xidmətlərindən istifadə edən şəxslərin bu dəyişikliklə bağlı narahatlıqlarına gəldikdə isə, əslində, ümumi maliyyə əməliyyatları ilə bağlı proseslər daha da şəffaflaşır. Məlumdur ki, sıravi vətəndaşlar gündəlik olaraq yüksək məbləğlərdə əməliyyatlar həyata keçirmirlər. Əksər hallarda sahibkarlar və ya digər şəxslər sıravi vətəndaşların bank hesablarından istifadə edirlər. Artıq bu kimi halların qarşısının alınması mümkün olacaq”, – deyə iqtisadçı qeyd edib.
Günay Hüseynova bildirib ki, həyata keçirilən kommersiya əməliyyatları qanuni şəkildə sənədləşdirildiyi və vergilər ödənildiyi halda, vətəndaşların narahatlığına əsas yoxdur:
"İkinci məsələ şirkətlərlə bağlıdır. Əgər şəxsin alış fakturası varsa, həyata keçirdiyi ticari əməliyyatlar qanunvericiliyin tələblərinə uyğundursa, bununla bağlı bəyannamə təqdim edilib, gəlirlər göstərilib və dövlət rüsumları ödənilibsə, 20 min deyil, 50 min manat da olsa, narahatlığa əsas yoxdur.
İstifadə davranışına təsirinə gəldikdə isə, sıravi vətəndaş üçün bunun ciddi təsiri olmayacaq. Fiziki və hüquqi şəxslərə gəldikdə isə, yuxarıda qeyd etdiyim kimi, sənədləri tam qaydasındadırsa, hər hansı problem yaranmamalıdır”.
İqtisadçının sözlərinə görə, sahibkarların vergidən yayınmaq məqsədilə vətəndaşların bank hesablarından istifadə etməsi halları müəyyən məsuliyyət yarada bilər.
"Əgər sahibkar tərəfindən əlavə üsullardan istifadə edilməklə vergidən yayınma halları baş verərsə, qanunvericiliyə əsasən həm sahibkar, həm də bu prosesdə vasitəçi olan vətəndaş məsuliyyətə cəlb oluna bilər. Yaxın zamanda daha effektiv mexanizmin hazırlanması gözlənilir”, – deyə G. Hüseynova əlavə edib.
Fəridə Əsədzadə
