"Azxəbər" informasiya portalı 18 oktyabr - Müstəqilliyin Bərpa Günündə yeni layihəsini təqdim edib.
AZXEBER.COM xəbər verir ki, "Şəhid qızı" adlanan layihə Azərbaycanın müstəqilliyi uğrunda canından keçmiş bütün şəhidlərimizə həsr edilir.
Layihənin ideya müəllifi Hacıbəy Heydərli, şeirin müəllifi Sədaqət Əhmədova, səsləndirən isə Aytac Vəlibəylidir.
Sədaqət Əhmədov vətənpərvərlik mövzusunda olan bir çox şeirin müəllifidir. Onun "Torpağına canım qurban, Azərbaycan" şeiri 44 günlük Vətən Müharibəsi zamanı ən çox səsləndirilən əsərlərdən olub.
Layihənin ideya müəllifi Hacıbəy Heydərli deyib ki, Şəhid övladlarına sahib çıxmaq hər bir azərbaycanlının borcudur:
"Şəhidlərimiz öz şirin canlarından vətən uğrunda, bizim xoşbəxtliyimiz, qürurlu və başıuca yaşamağımız üçün keçdilər.
Bizim də borcumuz onların yadigarlarına - övladlarına sahib çıxmaqdır. Hər birimiz çalışmalıyıq ki, onların qeydinə qalaq, onları yaşadaq. "Şəhid qızı" layihəsi də məhz şəhidlərimizin övladlarına həsr edilir. Allah bütün şəhidlərimizə rəhmət eləsin, qazilərimizə can sağlığı versin".
"Şəhid qızı" adlı əsəri təqdim edirik:
Şəhid qızı
Ürəyin də özün kimi körpədir,
Sevincinə kölgə salmır kədərin.
Heç bilmirsən kədər nədir, dərd nədir,
Gülə-gülə açırsan hər səhəri.
Yapışırsan öz ananın əlindən,
Soruşursan "Atam nə vaxt gələcək?"
Qoparırsan yarasını bilmədən -
O qadınçün qaranlıqdır gələcək...
Böyüyərsən, anlayarsan itkini,
Baxışına həsrət çökər, qəm çökər.
Söz açmazsan, qınamazsan heç kimi,
Gözlərinsə həsrət-həsrət yol çəkər...
İllər keçər, dönüb gənc qız olarsan,
Xoş arzular aşıb-daşar sinəndə.
Doluxsunub keçmişlərə dalarsan
Qızlar "Bunu atam alıb" deyəndə...
Bir gün döyər qapınızı elçilər,
Atan süzər qonaqları şəkildən.
Yan otaqda qəhər sənə güc gələr,
Göz yaşların selə dönər qəfildən...
Həsrət dolu, nisgil dolu baxışın
Deşib keçər ürəkləri ox kimi.
Baharı heç gələn deyil bu qışın,
Bu nağılın üç alması yox kimi...
Şəhid qızı, bir zirvədir şəhidlik -
Cəsurların taleyini naxışlar.
O zirvənin ətəyində dincəlib
Həyatdan borc alanları bağışla...
