Bu gün – oktyabrın 3-də Ulu Öndər Heydər Əliyevin müstəqil Azərbaycanın Prezidenti seçilməsinin 33-cü ildönümüdür.
1993-cü il oktyabrın 3-də keçirilən prezident seçkilərində Heydər Əliyev Azərbaycan Respublikasının Prezidenti seçilib. Həmin dövr ölkədə siyasi və iqtisadi baxımdan mürəkkəb vəziyyətin hökm sürdüyü bir vaxt kimi xarakterizə olunur.
Bəs Heydər Əliyevin prezident seçilməsi Azərbaycanın sonrakı inkişafında hansı rol oynadı? Bu siyasi qərarın ölkənin dövlətçilik tarixində əhəmiyyəti nədən ibarət idi?
Mövzu ilə bağlı AZXEBER.COM-a danışan Milli Məclisin deputatı Hikmət Babaoğlu bildirib ki, 1993-cü il oktyabrın 3-ü Azərbaycanın siyasi və dövlətçilik tarixində mühüm hadisələrdən biridir:
"Üç oktyabr 1993-cü il Azərbaycanın siyasi tarixində, hüquqi tarixində mühüm bir hadisə ilə yadda qaldı. Ona görə ki, bu tarixdə ilk dəfə olaraq Azərbaycanda Azərbaycan xalqının siyasi iradəsi ilə dövlət başçısı seçildi. Azərbaycan Prezidenti seçildi və Azərbaycan xalqı 98,8 faizlə Heydər Əliyevi hakimiyyətə gətirmiş oldu. Bu, məsələnin bir tərəfi. İkinci, bu 3 oktyabrın tarixiliyi ondan ibarətdir ki, Azərbaycanda müstəqilliyimizi əldə etdikdən sonra legitim hakimiyyət formalaşdırıldı. Yəni xalq özü istədiyi siyasətçini prezident seçdi. Bu da məsələnin ikinci tərəfi”.
Deputatın sözlərinə görə, Heydər Əliyevin hakimiyyətə gəlməsi Azərbaycanda dövlət quruculuğu prosesinin sürətlənməsinə və dövlət institutlarının fəaliyyətinin bərpasına təsir göstərib:
"Amma 3 oktyabr tarixi həm də Heydər Əliyevin hakimiyyətə gəlməsi ilə bərabər Azərbaycan dövlətçiliyinin firavan edilməsinin başlanğıcı tarixi oldu. Azərbaycanda vətəndaş müharibəsinin dayandırılmasının tarixinə çevrildi. Sonrakı mərhələdə Azərbaycan dövlətinin yenidən qurulması hadisəsinə çevrildi və beləliklə də biz yalnız 3 oktyabr 1993-cü ildə Heydər Əliyev hakimiyyətə gəldikdən sonra müstəqil milli dövlətimizi qurmağa başladıq, dövlət qurumlarının funksionallığını bərpa etməyə başladıq, dövlət və vətəndaş arasında etimad mühitini formalaşdırmağı bacardıq”.
H. Babaoğlu bildirib ki, həmin dövrdə ordu quruculuğu və dövlətin iqtisadi əsaslarının formalaşdırılması istiqamətində də mühüm addımlar atılıb:
"Milli ordu qurmağı bacardıq və dövlətçiliyimizin iqtisadi əsaslarını yaratdıq. Beləliklə də 1993-cü il 3 oktyabrdan başlayan yol nəhayət 2020-ci il 27 sentyabra qədər davam etdi. 27 sentyabrdan sonra baş verən 44 günlük müharibə isə əslində Azərbaycan dövlətinin öz xalqı qarşısında və tarix qarşısında imtahanı idi və biz bu imtahanı qələbə ilə, Zəfərlə verməyi bacardıq”.
Deputat vurğulayıb ki, 3 oktyabr 1993-cü il Azərbaycanın sonrakı dövlətçilik tarixində mühüm mərhələlərdən biri kimi qiymətləndirilir:
"Bax, əgər 3 oktyabr olmasaydı, yəqin ki, bu gün ərazi bütövlüyünü və suveren hüquqlarını bərpa etmiş Azərbaycan da olmazdı. Ona görə biz bu tarixi mütləq xatırlamalı və özümüzə qarşı, özümüz öz qarşımızda Azərbaycan xalqı öz-özünə isbat verməlidir ki, qəbul etdiyi bu qərar Azərbaycanı necə böyük, necə güclü etdi, necə qalib ölkəyə çevirdi”.
Fəridə Əsədzadə
