Gülsel Səfərova: “Bu xanımlarımızın qarşısında yeni imkanlar açır”
“İnanıram və şübhə etmirəm ki, yüksək vəzifəyə təyinat alan xanımlar idarəetməyə yeni nəfəs gətirəcək və onların məsul olduğu sahələrda inkişaf qeydə alınacaq”.
Bu sözləri Editor.az-a açıqlamasında Azərbaycanlı Gənclərin Avropaya İnteqrasiya Təşkilatının (AGAT) sədri Gülsel Səfərova son dövrlər qadınların yerli idarəetmə orqanlarında yüksək vəzifəyə təyinat almasına münasibət bildirərkən belə deyib.
Onun sözlərinə görə, Azərbaycan cəmiyyətində qadınların həmişə özünəməxsus rolu olub: “Azərbaycanda gender bərabərliyinin, qadınların potensialından dövlət idarəçiliyində istifadə olunmasının əsası Ulu Öndər Heydər Əliyev tərəfindən qoyulub. Bu gün də cənab Prezident İlham Əliyev bu siyasəti uğurla davam etdirir və vaxtaşırı olaraq xanımlarımıza yüksək etimad göstərilir. Hesab edirəm ki, xanımlarımızın, xüsusən gənc xanımlarımızın yerli idarəetmə orqanlarında əsas postlardan birinə sahiblənməsi bütövlükdə biz xanımların qarşısında geniş imkanlar açır. Bütün hallarda cinsindən asılı olmayaraq, istənilən peşəkar kadr vəzifəyə gətirilməyə layiqdir və bu mənada mən bu prosesə təbii baxıram. Azərbaycan tarixində kifayət qədər xanımlar olub ki, onlar öz istedadı, qabiliyyəti ilə nəinki ölkəmizdə, bütün dünyada tanınıblar və dövlətimizin adını yüksəklərə qalıdırıblar”.
