Xəbər verdiyimiz kimi, Azərbaycan Prezidenti İlham Əliyev 15 noyabrda Özbəkistana işgüzar səfər edib. Dövlət başçısı Daşkənddə keçirilən Mərkəzi Asiya Dövlət Başçılarının 7-ci Məşvərət Görüşündə iştirak edib. Səfər çərçivəsində İlham Əliyev Özbəkistan Prezidenti Şavkat Mirziyoyevlə təkbətək görüş keçirərək iki ölkə arasında əməkdaşlıq, regional layihələr və strateji tərəfdaşlığın genişləndirilməsi məsələlərini müzakirə edib.
Milli Məclisin deputatı Müşfiq Cəfərov AZXEBER.COM-a açıqlamasında deyib ki, sözügedən görüş regionun gələcək inkişaf strategiyasını formalaşdırmaq, ölkələrarası əməkdaşlığı dərinləşdirmək və yeni regional təşəbbüsləri razılaşdırmaq baxımından olduqca əhəmiyyətlidir:
"Sözügedən görüş regionun gələcək inkişaf strategiyasını formalaşdırmaq, ölkələrarası əməkdaşlığı dərinləşdirmək və yeni regional təşəbbüsləri razılaşdırmaq baxımından olduqca əhəmiyyətlidir. Son illər Azərbaycanın Mərkəzi Asiya ölkələriylə iqtisadi, nəqliyyat, investisiya və enerji sahələrində əməkdaşlığı güclənməkdədir. Azərbaycanla Mərkəzi Asiya dövlətləri arasındakı əməkdaşlıq ikitərəfli münasibətlər çərçivəsindən çıxaraq vahid siyasi format səviyyəsinə yüksəlibdir. Artıq bu əlaqələr tarixi-mədəni yaxınlıqdan daha geniş, daha funksional və daha strateji bir məzmuna malikdir”.
Deputat deyib ki, Mərkəzi Asiya üçün Orta Dəhlizin inkişafı çox böyük əhəmiyyət daşıyır:
"Mərkəzi Asiya üçün Orta Dəhlizin inkişafı çox böyük əhəmiyyət daşıyır. Belə ki, yüklərin Avropaya daha səmərəli daşınması məsələsi prioritetdir. Beləliklə dövlətimiz Mərkəzi Asiyanın Avropa və Xəzər regionu ilə əlaqələrinin gücləndirilməsində vasitəçi ola bilər”.
Parlamentari vurğulayıb ki, artıq Azərbaycan Mərkəzi Asiyanın tərkib hissəsi kimi qəbul olunur:
"Artıq Azərbaycan Mərkəzi Asiyanın tərkib hissəsi kimi qəbul olunur və bu istiqamətdə keçirilən bütün təmaslarda tamhüquqlu iştirakçı status da qazandı. Bu, sadəcə simvolik jest deyil, yeni bir siyasi xəritənin formalaşması deməkdir. Azərbaycanın Mərkəzi Asiya platformasına daxil edilməsi son illər dövlətimizin bu öklələrlə sürətlə inkişaf edən strateji əməkdaşlığından irəli gəlir.
Bu qərardan sonra Azərbaycanın yalnız müşahidəçi və ya tərəfdaş kimi deyil, məhz regional qərarların qəbulunda söz sahibi kimi çıxış edəcəkdir”.
Şahanə Ziyad
