Azərbaycan və MDB gənclərinin birgə iştirakı ilə Rusiyada keçirilən “Müstəqil Dövlətlər Birliyinin Gənclər Günü” düşərgəsi yekunlaşıb.
Düşərgənin son günü Azərbaycan Respublikası Gənclər Təşkilatları Milli Şurasının sədri Şahin Seyid-zadə, “İRƏLİ” İctimai Birliyinin Nəzarət-Təftiş Komissiyasının rəhbəri Xəqani Fərəcov, ARGTMŞ-nin sədr müavini Ramiz Əliyev və Azərbaycan Tələbə Gənclər Təşklatları İttifaqının fəalı Əjdər İbrahimovla təmsil olunun nümayəndə heyəti Rossotrudniçestvo (“Россотрудничество”), Rusiya Federasiyasının İctimai Palatası, Rusiya Menecerlər Assosiyasiyası, Moskva Millətlər Evi və Rusiya Federasiyanın Mərkəzi vilayətdə Prezidentin şəxsi nümayəndəsi ilə görüşüblər.
Görüşlər zamanı hər iki ölkənin gənclər siyasəti haqqında məlumat verilib, gənclər haqqında qanunlar, gənclərlə bağlı proqramlar ətrafında müzakirələr aparılıb. Qeyd edilib ki, MDB ölkələri arasında yeni əməkdaşlıq körpüsünün yaradılması gənclər sferasında qarşılıqlı əlaqələrin qurulmasına müsbət töhfəsini verəcək.
Xatırladaq ki, “Müstəqil Dövlətlər Birliyinin Gənclər Günü”nə həsr olunmuş Beynəlxalq Gənclər Düşərgəsi çərçivəsində “Birlik” Beynəlxalq Gənclər Təşkilatının təsis konfransı keçirilib. Yeni yaranmış təşkilatın Azərbaycan Respublikası Gənclər Təşkilatları Milli Şurasının (ARGTMŞ) rəhbəri Şahin Seyidzadə və “İRƏLİ” İctimai Birliyinin Nəzarət–Təftiş Komissiyasının rəhbəri Xəqani Fərəcov İdarə Heyətinin, ARGTMŞ–nin sədr müavini Ramiz Əliyev isə Nəzarət - Təftiş Komissiyasının üzvü seçiliblər.
