"Görünür, onlar dənizdə kostyumla çimirlər"
Azər Məhərrəmov barəsində yayılan xəbərlərə münasibət açıqlayıb. AEGEE-Sumqayıt-ın (Avropa Tələbələr Forumu-Sumqayıt İctimai Birliyi) sədri Azər Məhərrəmovla bağlı bu gün pia.az saytında yayılan informasiya ictimai sektorda ciddi narazılıq yaradıb. A.Məhərrəmovun özü AZXEBER.COM-a açıqlama verərək, şəxsi həyatına aid fotunun saytda yayınlanmasına maraqlı cavab verib: "Mən başa düşmürəm ki, mənim işdən kənar dənizdə və ya hovuzda dostlarımla çimməyimin, şəkil çəkdirməyimin adamlara nə aidiyyatı var. Hər gün dənizdə milyonlarla adam çimir, şəkil çəkdirir. Bu məntiqlə həmin sayt onlarının hamısının şəkilini yaymalıdır?! Ola bilər, mənim haqqımda bu yazını sifariş verənlər və onların dostları dənizdə, hovuzda kostyumla çimirlər. Ümumlikdə isə, bu yazı mənim şəxsi həyatıma müdaxilədir və hüquqi məsuliyyət yaradır. Yaxın zamanlarda bununla bağlı müvafiq addımlar atacam. Burada söhbət fotodan getmir. Fotoda problem olsaydı, onu facebook səhifəsi vasitəsilə yayımlamazdıq. Məsələ şəxsi fotonun ətrafında "siyasi əfsanə" uydurmaqdan gedir. İllər boyu dostluq etdiyim adamlarla harada görüşüb, necə şəkil çəkdirmək mənim şəxsi işimdir".
Azər Məhərrəmov eyni zamanda yazıda adı keçən "İrəli" İctimai Birliyinə olan münasibətindən söz açıb: "Mənim "İrəli"yə və onun üzvlərinə sonsuz hörmətim var. Hesab edirəm ki, "İrəli" Azərbaycanın ən güclü və perspektivli təşkilatıdır. Mən isə İRƏLİ-də hər hansı bir vəzifə tutmuram və məsələnin İRƏLİ ilə yaxından, uzaqdan heç bir əlaqəsi yoxdur".
