“Gənc Liderlər üçün Qış Universiteti – Kreativ Başlanğıc” layihəsinin seçim turu başa çatıb.
"İrəli" İctimai Birliyinin mətbuat xidmətindən AZXEBER.COM-a verilən məlumata görə, “İRƏLİ” İctimai Birliyinin təşkilatçılığı və Azərbaycan Respublikası Gənclər və İdman Nazirliyinin dəstəyi ilə, 5-8 fevral tarixlərində Bakı şəhərində keçiriləcək “Gənc Liderlər üçün Qış Universiteti – Kreativ Başlanğıc” layihəsinin seçim turu başa çatıb.
Məlumata görə, layihəyə iştirak üçün 1000-ə yaxın müraciət daxil olub və dəyərləndirmədən sonra ən yaxşı 200 nəfər müsahibəyə dəvət olunub.
Bildirilib ki, müsahibə mərhələsi 21-22 yanvar 2013-cü il tarixləri arasında “İRƏLİ” Gənclik Mərkəzində keçirilib.
Qeyd edək ki, “Gənc Liderlər üçün Qış Universiteti” layihəsi 2009-cu ildən etibarən hər il keçirilir və Azərbaycanın ən fəal və potensiallı gənclərini bir araya gətirir. Bu il “Gənc Liderlər üçün Qış Universiteti” layihəsi “Kreativ başlanğıc” adı altında Bakı şəhərində keçiriləcək.
4 gün davam edəcək layihə müddətində iştirakçılar gəncləri əhatə edən müxtəlif və gündəmdə olan mövzular üzrə ölkənin aparıcı ekspertləri ilə görüşəcək, fikir mübadiləsi aparacaq, yeni təşəbbüs və təkliflər üzərində çalışacaqlar. Eyni zamanda 5 komandaya bölünən iştirakçılar layihə müddətində fəal iştirak üçün biri-biriləri ilə yarışacaqlar.
