Britaniyada bir kompüter proqramçısı gənc qızları onların təhsil haqlarını ödəyəcəyi vədi ilə tora salmaqda ittiham edilir. Qadın ovçusu Mark Lankasterin özü isə “The İndependent” qəzetinin qurduğu tələyə düşüb. Qəzet öz qadın müxbirlərindən birini, Lankasterin “qəbuluna” göndərib. Hakim Mark Lankasteri insan alverində və voayerizmdə müqəssir bilib.
Voayerizmi “şorgözlük” sözü ilə də tərcümə etmək olar, lakin hüquq dilində bu “seksual həzz məqsədi ilə çılpaq adamların gizli müşahidə edilməsi” deməkdir. Əslində 39 yaşlı məhkum ələ keçməsi üçün böyük bir ipucu verib. O qurduğu Sponsorascholar.co.uk internet saytında öz müştəriləri ilə hər semestrdə bir dəfə yatmaq müqabilində tələbə olmaq istəyən qızlara təhsil haqqını ödəməyi vəd edirdi.
Britaniya polisi Skotland Yard bildirib ki, Mark Lankasterin saytına 40-adək qadın müraciət edibmiş. Ən maraqlısı isə budur ki, evli və iki uşaq atası olan Lankaster bir vaxtlar ölkənin Müdafiə Nazirliyi üçün də kompüter proqramları yaradırmış. Mark Lankaster kirayə etdiyi mənzilin vanna otağında “tələbə olmaq istəyənlərdən biri ilə “hazırlıq testi”nin videosunu çəkmək üçüm kamera qurduğunu” etiraf edib. O həmçinin insan alverində də ittiham olunur ki, bu da 14 ilədək azadlıqdan məhrumetməni nəzərdə tutur.//publika.az
