"Qarşılaşmanın sonlarında penalti verilməli idi".
Bunu "Kəpəz"in baş məşqçisi Tərlan Əhmədov səfərdə "Turan Tovuz"la 2:2 hesablı heç-heçə etdikləri Azərbaycan Kubokunun 1/4 final mərhələsinin cavab oyunundan sonra mətbuat konfransında deyib.
51 yaşlı mütəxəssis görüşün sonlarında həmin epizoda dəfələrlə baxdıqlarını bildirib: "Hakim onu necə verməyə bilər? Bu, hələ də sual doğrurur. Artıq hər şey keçmişdə qalıb, kubok bizim üçün bitmiş sayılır. "Zirə" ilə çempionat oyununa hazırlaşmalıyıq. Yaxşı oynadıqları üçün futbolçularıma təşəkkür edirəm".
Əhmədov maraqlı oyun izlədiklərini sözlərinə əlavə edib: "İlk görüşdə 1:2 hesabı ilə uduzmuşduq. İstər-istəməz komandada bir az təzyiq var idi. İlk dəqiqələrdə həyacan, inamsızlıq hiss edilirdi. Qarşılaşmanın əvvəlində iki top buraxsaq da, geridönüş edə bildik. Hətta qalib də gələ bilərdik. Hər iki komanda gələcəyə ümid verir".
Təcrübəli baş məşqçi müdafiə futbolu oynatmağı xoşlamadığını vurğulayıb: "Fəlsəfəmi dəyişəsi deyiləm. Bu gün də eyni üslubda meydana çıxdıq. Komanda rəqibə və azarkeşlərə həyəcan yaşatmalıdır. Həmişə oyunçulardan bunu istəmişəm”.
Mütəxəssis qış transfer dönəmində bir neçə futbolçu ilə vidalaşacaqlarını deyib: "Siyahını rəhbərliyə təqdim etmişəm. Heyət gəncləşdirilməli və yeni nəfəs gəlməlidir. U-21 millisindən və akademiyamızdan oyunçular cəlb etmək niyyətindəyik. Yerli və əcnəbilərlə danışıqlarımız davam edir”.
///Report
