Azərbaycanın siyasi gündəmində Azərbaycan Xalq Cəbhəsi Partiyası (AXCP) və Müsavat partiyalarının fəaliyyəti ilə bağlı məsələlər yenidən diqqət mərkəzinə çıxıb. Ekspertlər bildirirlər ki, hazırkı beynəlxalq gərginlik fonunda "5-ci kolon” adlandırılan radikal qruplara qarşı bir çox ölkələrdə sərt tədbirlər görülür. Oxşar proseslərin Azərbaycanda da gündəmə gəlməsi, xüsusilə AXCP və Müsavat kimi partiyaların siyasi fəaliyyətinə son qoyulması ilə bağlı çağırışların artmasına səbəb olub.
Milli Məclisin hakim Yeni Azərbaycan Partiyasından deputatı Hikmət Babaoğlu AZXEBER.COM-a açıqlamasında deyib ki, AXCP və Müsavat cütlüyü Azərbaycanda radikalizmin, anarxiyanın və dağıdıcılığın simvollarıdır:
"AXCP və Müsavat cütlüyü Azərbaycanda radikalizmin, anarxiyanın və dağıdıcılığın simvollarıdır. Onlar 90-cı illərin əvvəllərində ölkəmizdə siyasi sistemin demokratik əsaslarda formalaşmasına ciddi zərbə vurmuş təşkilatlanmalardır. Hər iki qurumun bu gün, mövcud tarix mərhələsində, Azərbaycanın siyasi sistemində yer almasına zərurət yoxdur. Çünki dövlətçiliyimizin inkişafı, insan hüquqlarının və demokratik dəyərlərin möhkəmlənməsi, siyasi mədəniyyətin tərəqqisi radikalizmi və anarxiyanı rədd edir”.
Parlamentari vurğulayıb ki, AXCP–Müsavat cütlüyü tarixi zəfərimiz zamanı Azərbaycan xalqının sevincinə şərik olmadı:
"AXCP–Müsavat cütlüyü tarixi zəfərimiz zamanı Azərbaycan xalqının sevincinə şərik olmamaqla, ölkəmizin apardığı tarixi mübarizəyə dəstək verməməklə özlərini xalqın ictimai yaddaşından silmiş oldular. Buna görə də onların bu gün siyasi sistemimizdə mövcud olması, həmin sistemə böyük zərbədir. Çünki bu qurumlar siyasi inkişafın qarşısını alaraq sistemin önündə tormozlayıcı funksiyanı yerinə yetirirlər. Yəni, AXCP və Müsavat partiyaları bu gün siyasi sistemimizin inkişafına maneə yaradan qüvvələr kimi çıxış edirlər. Ona görə də mənə elə gəlir ki, ictimai dəstəklərinin olmadığı şəraitdə, bu partiyaların könüllü şəkildə fəaliyyətlərinə xitam verməsi daha məqsədəuyğun olar”.
Şahanə Ziyad
