Səhər saatlarında "İçərişəhər" stansiyasının giriş sahəsində qatarda yaranan texniki nasazlıq qırmızı xətt üzrə hərəkəti ləngidib.
AZXEBER.COM Xezerxeber.az-a istinadən xəbər verir ki, hadisə "İçərişəhər-Əhmədli" sahəsində qatarlar arasındakı intervalın artmasına səbəb olub. Nasaz qatarın xətdən çıxarılması üçün köməkçi qatar cəlb edilib.
"Bakı Metropoliteni" QSC-nin mətbuat katibi Bəxtiyar Məmmədov bildirib ki, "İçərişəhər" stansiyasında dönmə kamerası olmadığından qatarın giriş sahəsindən uzaqlaşdırılması müəyyən vaxt aparıb.
Qurum rəsmisi bildirib ki, qırmızı xəttdə gecikmə stansiyalardan asılı olaraq 30-40 dəqiqə təşkil edib. Nasaz qatar xətdən çıxarıldıqdan sonra qırmızı xətt üzrə interval bərpa olunub. Bəxtiyar Məmmədovun sözlərinə görə, hadisə yalnız Qırmızı xətt üzrə hərəkətə təsir göstərib. Metropolitendə qatarların hərəkəti artıq xətlər üzrə müstəqil təşkil olunduğundan əvvəlki dövrlərdən fərqli olaraq bir xətdə yaranan problem digər xətlərdə hərəkətin dayanmasına səbəb olmayıb. yaşıl və bənövşəyi xətlərdə qatarlar qrafikə uyğun hərəkət edib.
Yeni tədris ilinin başlanması ilə əlaqədar metroda sərnişin axınının artacağı da nəzərə alınıb. Son günlər aparılan monitorinqlərdən sonra sentyabrın 15-dən etibarən ayrı-ayrı xətlər üzrə qatarlar arasındakı intervalların azaldılması qərara alınıb.
