Son zamanlar "Space TV”nin bağlanacağına dair iddialar da gündəmə gəlib. Telekanalın məşhur verilişləri bağlanıb, maliyyə çatışmazlığı yaranıb, eyni zamanda reytinq cədvəlindən də çıxıb. Telekanalın yaxın günlərdə tamamilə bağlanacağı da gəzən söz-söhbətlər arasındadır.
AZXEBER.COM mövzunun aktuallığını nəzərə alaraq bundan əvvəl fəaliyyətini dayandırmış televiziya kanalları barədə kiçik araşdırma aparıb.
Həmin kanalların siyahısını təqdim edirik:
ANS TV - 1991-ci ildə yaradılıb. 2016-cı ildə rəsmi qərarla bağlanıb və bunun əsas səbəbi yayımla bağlı qayda pozuntuları olub. Həmin vaxt ANS TV Türkiyədə çevrilişdə və terror təşkilatı qurmaqda ittiham Fethullah Gülen ilə müsahibə yayımlayacağını elan etmişdi. Bu addım Azərbaycan tərəfdə ciddi narazılıq doğurdu.
Bundan sonra Milli Televiziya və Radio Şurası ANS-in yayımını dayandırdı və kanalın lisenziyası ləğv edildi. Rəsmi açıqlamalarda bildirildi ki, kanalın fəaliyyəti "ölkənin milli maraqlarına zidd addımlar” kimi qiymətləndirilib.
ABA TV - 1997-ci ildə Azərbaycanda yayıma başlayıb, 2001-ci ildə bağlanan televiziya kanalıdır. Həmin dövrdə televiziya sahəsində daha sərt qaydalar tətbiq edilirdi və bəzi kanallar bu tələblərə uyğunlaşa bilmədiyi üçün efirdən uzaqlaşdırıldı. ABA TV-nin də bu səbəbdən bağlandığı iddia olunur.
Lider TV - 2000-ci ildə fəaliyyətə başlayıb. Kanal uzun müddət aşağı reytinqlər, reklam gəlirlərinin azalması və borclar səbəbindən çətin vəziyyətə düşmüşdü. 16 iyun 2020-ci ildə məhkəmə qərarı ilə müflis elan edilmişdir. 1 iyun 2021-ci ildən etibarən Lider TV və radiosunun fəaliyyəti rəsmən dayandırılmışdır.
Region TV - 2014-cü ildə fəaliyyətə başlayıb. 2019-cu ildə yayımı dayandırılıb. Kanal rebrendinq və media strukturunun yenilənməsi səbəbilə bağlandı və resursları ARB24-ə yönləndirildi.
Şahanə Ziyad
