Yay fəsli yaxınlaşdıqca, paytaxtın müxtəlif ərazilərində daşınmaz əmlakın kütləvi satışı müşahidə olunur.
Bakının mərkəz hissəsini təşkil edən Səbail, Nəsimi, Yasamal və Nərimanov rayonlarında yeni tikili mənzillərin qiymətində ciddi artım nəzərə çarpır.
Aprelin əvvəllərində yağan intensiv yağışlardan sonra həyət evlərində baş verən subasma və drenaj problemləri daşınmaz əmlakın bu seqmentinə olan alıcı marağını kəskin şəkildə azaldıb.
Hazırda bahalı mənzillərin ən çox satıldığı ərazi Nəsimi rayonudur. Rayonun "28 May” metrostansiya yaxınlığında yerləşən yenitikili binalarda dəyəri 1 milyon manatdan yuxarı olan çox sayda mənzil satışa çıxarılıb.
Nəsimi rayonu, Neftçilər prospektində yerləşən "Cresent Residences”ə məxsus binada təklif olunan 171 kvadratmetr sahəli mənzilin dəyərli 2 milyon 420 min manatdır. 3 otaqdan ibarət olan mənzil 33 mərtəbəli binanın 28-ci mərtəbəsində yerləşir. Binada sakinlər üçün yeraltı parkinq, qapalı hovuz və müasir fitnes zalı kimi xidmətlər mövcuddur.
Sözügedən yaşayış kompleksində yerləşən daha bir mənzil isə nə az nə çox, 3 milyon 625 min manata təklif edilir. 260 kvadratmetr sahəsi və 5 otağı olan əmlakın ipoteka ilə satışı da mümkündür.
"28 May” metrostansiyasının yaxınlığında satışa çıxarılan 4 otaqlı yenitikili mənzilin qiyməti 1 milyon 240 min manat təşkil edir. Çıxarışlı və təmirli mənzilin sahəsi 240 kvadratmetrdir. Mənzil məktəb, baxça, aptek və supermaketlərin yaxınlığında yerləşir.
///Yeni Sabah
