Endirim kampaniyaları istehlakçıların alış qərarlarına ciddi təsir göstərə bilir. Bəzən insanlar ehtiyacları olmayan məhsulları belə yalnız qiyməti aşağı düşdüyü üçün alırlar.
AZXEBER.COM xəbər verir ki, mütəxəssislərin fikrincə, bunun əsas səbəblərindən biri insanın məhsulun özündən çox, əldə etdiyi "qazanca” fokuslanmasıdır. Məsələn, 100 manatlıq məhsulun 70 manata satılması alıcıda 30 manat qənaət etdiyi hissini yaradır. Halbuki həmin məhsula ehtiyac yoxdursa, istehlakçı əslində 70 manat xərcləmiş olur.
"Yalnız bu gün”, "son fürsət”, "məhdud sayda” kimi ifadələr də alış qərarına təsir edən amillərdəndir. Bu cür mesajlar insanlarda fürsəti qaçırmaq qorxusu yarada və onları daha sürətli qərar verməyə sövq edə bilər.
Digər tərəfdən, məhsulun əvvəlki qiymətinin yüksək göstərilməsi endirimli qiymətin daha sərfəli görünməsinə səbəb olur. Psixologiyada bu yanaşma "ankerləmə effekti” ilə izah edilir. Nəticədə istehlakçı məhsula həqiqətən ehtiyacı olub-olmadığını deyil, endirimin nə qədər böyük olduğunu əsas götürə bilər.
Beləliklə, endirim hər zaman qənaət demək deyil. Bəzən "sərfəli alış” düşüncəsi insanı planlaşdırdığından daha çox pul xərcləməyə vadar edə bilər.
Şahanə Ziyad
