52 yaşlı həkim xəstəni immunçatışmazlığı virusuna (HİV) yoluxdurduğu üçün cəzalandırılıb. Onun həkim kimi fəaliyyətinə xitam verilib.
AZXEBER.COM Musavat.com-a istinadən xəbər verir ki, Naxçıvan Muxtar Respublikası Gigiena və Epidemologiya Mərkəzinin QİÇS-lə mübarizə şöbəsinin həkim-laborantı Nəsibə Zamanova (ad və soy adı şərtidir) işdən çıxarılıb.
O, işlədiyi dövrdə öz xidməti vəzifələrini lazımınca yerinə yetirə bilməyib. Onun işlədiyi müddətdə hamilə pasientlərdən birinə qan lazım olub. Donor isə hamilə qadının atası olub. Həkim N.Zamanova lazım olan müayinələri aparmayıb və donor olan atanın qanında immunçatışmazlığı virusunu müəyyən edə bilməyib. Bununla da hamilə qadının immunçatışmazlığı virusuna yoluxmasına səbəb olub.
Pasientin HİV virusuna yoluxması isə doğuşdan sonra müəyyən edilib. Doğulan körpədə isə virus aşkarlanmayıb.
N.Zamanova bu əməlinə görə peşman olub. 20 ildən artıq Naxçıvan Muxtar Respublikası Gigiyena və Epidemiologiya Mərkəzinin QiÇS-lə mübarizə və profilaktika şöbəsində müxtəlif vəzifələrdə çalışmış Zamanova 2023-cü ildə öz ərizəsi ilə işdən ayrıldığını deyir.
HİV-ə yoluxmuş pasientin müalicəsi hazırda davam edir. O, həkimdən şikayətçi olmayıb, barışıblar.
Zamanova 1 il 6 ay müddətinə həkim fəaliyyəti ilə məşğul olma hüququndan məhrum edilib. 1 il 6 ay müddətə isə azadlığın məhdudlaşdırılması cəzasına məhkum edilib. O, bu müddət ərzində elektron qolbaqla gəzəcək.
