"İRƏLİ” İctimai Birliyi tərəfindən 20 Yanvar faciəsinin 35-ci il dönümünə həsr olunmuş silsilə tədbirlər həyata keçirilib.
AZXEBER.COM xəbər verir ki, "İRƏLİ” İctimai Birliyinin nümayəndələri və üzvləri Şəhidlər xiyabanında ölkəmizin müstəqilliyi və ərazi bütövlüyü uğrunda canından keçən şəhidlərimizin məzarlarını ziyarət ediblər.
Tədbirlər çərçivəsində Azərbaycan Respublikası Mədəniyyət Nazirliyinin Mədəniyyət üzrə Elmi - Metodiki və İxtisasartırma Mərkəzi, "İRƏLİ” İctimai Birliyi, "CƏNGİ” Gənclər Birliyi və Beynəlxalq Muğam Mərkəzinin birgə təşkilatçılığı ilə anım tədbiri keçirilib.Tədbirdə fotomüxbir Rasim Sadıxovun fotolarından ibarət sərgi və "Qanlı Yanvar” filmi təqdim olunub.
Silsilə tədbirlər müddətində həmçinin, "İRƏLİ” İctimai Birliyi və LIBRAFF Kitab mağazaları şəbəkəsinin müştərək layihəsi olan "Gənclərlə” adlı proqram çərçivəsində 20 Yanvar faciəsinin 35-ci ildönümünə həsr edilmiş ilk görüş keçirilib.
Görüşün ilk qonaqları Xalq artisti Nurəddin Mehdixanlı, fotomüxbir Rafiq Bağırov və fotojurnalist Rasim Sadıxov olublar.
Tədbirdə, 20 Yanvar faciəsinin əhəmiyyəti və onun gənclər üçün nə dərəcədə önəmli olduğu müzakirə olunub. Xalq artisti Nurəddin Mehdixanlı həmin günün xalqımızın yaddaşında necə qaldığını və onun bizə necə dərslər verdiyini vurğulayıb. Fotomüxbir Rafiq Bağırov, fotojurnalist Rasim Sadıxov isə 20 Yanvar hadisələrinin fotolarına baxaraq, həmin anların əhəmiyyətini və yaşanılan hisləri iştirakçılarla bölüşüb. Görüşün sonunda iştirakçılar həmin faciənin gənclər tərəfindən unudulmaması üçün daha çox belə tədbirlərin keçirilməsinin vacibliyini qeyd ediblər.
Silsilə tədbirlərin davamında təşkilat tərəfindən 20 Yanvar faciəsinin ildönümünə həsr olunmuş sosial media kampaniyası keçirilib. Gənclərin iştirakı ilə "X” sosial şəbəkəsində keçirilən aksiyada iştirakçılar Qanlı Yanvar hadisələri ilə bağlı faktlar və statistik məlumatları xarici dillərdə sosial media istifadəçiləri ilə bölüşüblər.
Bildirilib ki, həyata keçirilən tədbirlər planının əsas məqsədi Azərbaycan xalqının mübarizə dolu, tarixi səhifəsinin gənclərə aşılanması, 20 Yanvar faciəsi haqqında gənc nəslin məlumatlılığının artırılması, eyni zamanda törədilmiş cinayətlərin beynəlxalq miqyasda sosial şəbəkə istifadəçilərinə çatdırılmasıdır.
