Yeni tədris ilinin başlaması ilə məktəblərdə şagird sıxlığı da artır.
Uşaqların günün böyük hissəsini qapalı və kollektiv mühitdə keçirməsi isə müxtəlif yoluxucu xəstəliklərin yayılması üçün daha əlverişli şərait yaradır.
Xüsusilə payız-qış aylarında uşaqlar arasında soyuqdəymə, qrip və digər tənəffüs yolu infeksiyalarına daha çox rast gəlinir. Eyni zamanda, məktəb mühitində uşaqların bir-biri ilə sıx təmasda olması bəzi digər yoluxucu xəstəliklərin də yayılmasına səbəb ola bilər.
Bəs məktəblərin açılması ilə uşaqlar arasında hansı xəstəliklərin yayılma riski artır və valideynlər övladlarını bu xəstəliklərdən qorumaq üçün nələrə diqqət etməlidirlər?
Mövzu ilə bağlı AZXEBER.COM-a danışan həkim-pediatr Şəlalə Poluxova bildirib ki, məktəblərin açılması uşaqların mütləq xəstələnəcəyi anlamına gəlmir, sadəcə sıx təmas səbəbindən yoluxma ehtimalı artır:
"Məktəblərin açılması o demək deyil ki, xəstəliklər mütləq artacaq və uşaqlar xəstələnəcək. Sadəcə uşaqlar artıq bir-biri ilə daha yaxın və sıx təmasda olurlar. Bu da bakteriya və virusların bir-birinə ötürülməsi üçün daha əlverişli şərait yaradır. Ona görə də uşaqlar tətillə müqayisədə daha çox xəstələnə bilərlər. Uşağın balanslı qidalanmasına, yuxu rejiminə, fiziki aktivliyinə fikir verildikdə, D vitamini və digər pediatrik müalicələr həkim tövsiyəsinə uyğun aparıldıqda xəstələnmə riski daha aşağı olur”.
Şəlalə Poluxova bildirib ki, məktəblərdə ən çox rast gəlinən xəstəliklər arasında kəskin respirator virus infeksiyaları xüsusi yer tutur:
"Ən çox rast gəldiyimiz kəskin respirator virus infeksiyalarıdır. Bunlara adenovirus, parainfluenza, influenza, enterovirus kimi viruslar daxildir. Bunlar hər payız-qış mövsümündə rast gəldiyimiz tipik viruslardır. Burun axıntısı, burun tutulması, öskürək, boğaz ağrısı, hərarət və halsızlıq əsas əlamətlərdir. Qrip virusu da payız-qış mövsümündə əhəmiyyətli problemlərdən biridir. Uşaqlarda yüksək hərarət, baş ağrısı, əzələ ağrıları, halsızlıq, öskürək, qusma və digər simptomlar müşahidə oluna bilər. Bunun qarşısını almaq üçün payız mövsümündə qripə qarşı peyvənd olunmaq tövsiyə edilir. Peyvənd virusun tam qarşısını almasa da, xəstəliyin daha ağır keçməsi, xəstəxanaya yerləşdirilmə və digər ağırlaşmalar, o cümlədən ölüm riskini azaltmağa kömək edir”.
Həkim qeyd edib ki, respirator viruslarla yanaşı, digər infeksiyaların da məktəb mühitində yayılması mümkündür:
"RSV, COVID və digər çoxsaylı viruslar mövsüm ərzində bir-birini əvəz edə bilər. Hətta eyni vaxtda bir neçə virusa yoluxma da mümkündür. Buna görə də uşağın xəstələnməsi avtomatik olaraq konkret bir virusa yoluxduğu anlamına gəlmir. Qastroenteritlər, o cümlədən norovirus və adenovirus kimi bağırsaq virusları da aktual olur. Eyni zamanda, koksaki virusunun törətdiyi əl-ayaq-ağız xəstəliyinə məktəbəqədər və məktəbyaşlı uşaqlarda tez-tez rast gəlinir”.
Şəlalə Poluxova bakterial infeksiyalar arasında streptokok infeksiyasına da xüsusi diqqət yetirilməli olduğunu vurğulayıb:
"Bakterial infeksiyalar arasında daha çox rast gəlinənlərdən biri streptokok infeksiyasıdır. Onu virus infeksiyalarından fərqləndirmək çox önəmlidir. Streptokok infeksiyası zamanı yüksək hərarət, ciddi boğaz ağrısı, udqunmada çətinlik, badamcıqların şişməsi və bəzən irinlənmə müşahidə oluna bilər. Belə hallarda vaxtında həkimə müraciət edilməli və müalicə yalnız həkim nəzarəti altında aparılmalıdır. Uşaqların bir-biri ilə təması artdığı üçün yoluxucu xəstəliklərin yayılması üçün şərait yaranır. Məktəb və sinif otaqlarının tez-tez havalandırılması, uşaqlara öskürmə və asqırma etiketi qaydalarının öyrədilməsi vacibdir. Peyvəndlərin vaxtında vurulmasına da nəzarət edilməlidir. Xəstə uşaqlar isə məktəbə göndərilməməlidir”.
Fəridə Əsədzadə
