Yeni tədris ilinin başlaması ilə valideynlərin məktəblə bağlı xərcləri də davam edir.
Dərslərin başlamasından sonra şagirdlərin nəqliyyat, ictimai iaşə, hazırlıq kursları, repetitor, dərnək və digər xidmətlərə ehtiyacı artır. Xüsusilə məktəbdənkənar hazırlıq və nəqliyyat xərcləri ailələrin aylıq büdcəsində əlavə yük yarada bilər.
Bəs tədris ilinin başlaması hansı xidmətlərə tələbatı daha çox artırır və bu, qiymətlərə təsir göstərə bilərmi?
Mövzu ilə bağlı AZXEBER.COM-a danışan iqtisadçı Günay Hüseynova bildirib ki, tədris ilinin başlaması ilə bir sıra xidmətlərə tələbat artsa da, bu, bütün sahələrdə qiymət artımına səbəb olmur:
"Tədris ilinin başlaması əksər sahələrdə tələbi artırsa da, təklif də kifayət qədərdir. Əslində ilk günlərdə tələblə bağlı olaraq müxtəlif sahələrdə qiymət artımından daha çox endirimlər mövcuddur. Tədris ilinin başlaması ilə əlaqədar olaraq geyim, kafe və restoran xidmətlərinə tələbat artır. Qiymətləri isə nisbətən münasib etmək satışı çoxaldır. Bu üsul sahibkarın gəlirlərini də artırır”.
İqtisadçı qeyd edib ki, tədris ilinin başlaması ilə bəzi xidmət sahələrində qiymət artımı da müşahidə oluna bilər:
"Digər məsələ isə sabit qiymətlərdəki artımla əlaqədar ola bilər. Məsələn, repetitor, bağça, məktəbəqədər hazırlıq xidməti göstərən özəl müəssisələrdə, eləcə də kirayə evlərin qiymətlərində artım mümkündür. Çünki bu kimi xidmət sahələrində qiymətlər əksərən il ərzində dəyişməz qalır və məhz bu səbəbdən həmin sahə ilə məşğul olanlar tədris ilinin başlanması ərəfəsində qiymət artımına gedirlər. Əslində qiymət artımı ya gəlirlərin artımına, ya da illik inflyasiyaya uyğun olmalıdır. Təəssüf ki, bizdə belə deyil. Xidmət sahəsi ilə məşğul olan sahibkar ətrafdakı vəziyyətə və ya öz istəyinə uyğun olaraq qiymətləri yüksəldir".
Fəridə Əsədzadə
