Xəbər verdiyimiz kimi, parlament İnsan hüquqları üzrə müvəkkilin (ombudsmanın) aylıq vəzifə maaşının 12 min manat müəyyən edilməsini təsdiqləyib.
Bununla da ombudsmanın aylıq vəzifə maaşı 3 060 manatdan 12 min manata qaldırılıb.
İnsan hüquq və azadlıqlarının müdafiəsinə nəzarət edən ombudsmanların əməkhaqları ölkədən ölkəyə ciddi şəkildə fərqlənir. Bəzi dövlətlərdə bu vəzifənin maaşı ayrıca müəyyən edilir, digərlərində isə ombudsmanın əməkhaqqı yüksək vəzifəli dövlət məmurlarının, nazirlərin və ya ali məhkəmə hakimlərinin maaşlarına bağlanır.
AZXEBER.COM müxtəlif ölkələrin insan hüquqları üzrə müvəkkillərinin aylıq gəlirlərini araşdırıb.
Ukrayna
Ukrayna Ali Radasının İnsan Hüquqları üzrə Müvəkkili Dmitro Lubinetsdir. Onun səlahiyyət müddəti 1 iyul 2022-ci ildə başlayıb.
Lubinetsin rəsmi bəyannaməsində göstərilən təxminən 1,22 milyon qrivnalıq illik əməkhaqqı aylıq orta hesabla 100 min qrivnadan çox edir. Cari məzənnə ilə bu, təxminən 3 800–3 900 manat civarındadır.
Türkiyə
Türkiyənin Kamu Başdenetçisi, yəni Baş Ombudsmanı Mehmet Akarcadır. O, Türkiyə Böyük Millət Məclisi tərəfindən 12 noyabr 2024-cü ildə seçilib və dekabrda vəzifəsinin icrasına başlayıb.
Baş Ombudsmanın aylıq gəlirinin sosial ödəniş və əlavələrdən asılı olaraq təxminən 150–180 min TL intervalında olduğu göstərilir. Bu, təxminən 5 200–6 250 manat edir.
Qazaxıstan
Qazaxıstanın İnsan Hüquqları üzrə Müvəkkili Artur Lastayevdir. O, 2026-cı ilin avqustunda bu vəzifəyə yenidən seçilib.
Ombudsmanın maddi təminatı yüksək dövlət vəzifələrinin əməkhaqqı sistemi ilə əlaqələndirilir. Qazaxıstan nazirlərinin aylıq maaşı üçün göstərilən təxminən 1,52 milyon tenge əsas götürüldükdə, bu, manatla təxminən 5 800–5 900 manat edir. Faktiki ödəniş xidmət müddəti, əlavələr və digər amillərdən asılı olaraq dəyişə bilər.
Ermənistan
Ermənistanın İnsan Hüquqları Müdafiəçisi hazırda Anahit Manasyandır. O, 2023-cü ilin aprelindən bu vəzifəni icra edir.
Ermənistanda ombudsmanın əməkhaqqı yüksək dövlət vəzifələrinin maaş sistemi əsasında müəyyən edilir. 2026-cı il üçün göstərilən məbləğ təxminən 1,3 milyon dramdır. Mövcud məzənnə ilə bu, aylıq təxminən 6 000–6 100 manat deməkdir.
Gürcüstan
Gürcüstanın Xalq Müdafiəçisi Levan Ioselianidir. O, 2026-cı ildə də ölkənin Public Defender - Ombudsman vəzifəsini icra edir.
Mövcud əməkhaqqı sistemi üzrə Xalq Müdafiəçisinin aylıq maaşının 13 min laridən çox olduğu göstərilir. 13 min lari hazırkı məzənnə ilə təxminən 8 600 manat edir. Məbləğin 13 min laridən yüksək olması nəzərə alınarsa, faktiki manat ekvivalenti də bundan bir qədər çox ola bilər.
Rusiya
Rusiyada federal İnsan Hüquqları üzrə Müvəkkil vəzifəsində Yana Lantratova çalışır. Lantratova Dövlət Dumasının qərarı ilə 14 may 2026-cı ildə bu vəzifəyə təyin edilib.
Federal ombudsman üçün illik gəlirin müxtəlif əlavələr və ödənişlər nəzərə alınmaqla təxminən 5–7 milyon rubl, aylıq hesablamada isə təxminən 400–600 min rubl səviyyəsində ola bildiyi göstərilir. Bu məbləğ hazırkı məzənnə ilə təxminən 8 100–12 200 manat təşkil edir.
ABŞ
ABŞ-də Azərbaycan, Ermənistan və ya Ukraynadakı kimi ölkə üzrə vahid "İnsan Hüquqları üzrə Müvəkkil” vəzifəsi mövcud deyil. Ombudsman institutları ayrı-ayrı federal qurumlarda, ştatlarda, universitetlərdə və digər təşkilatlarda fəaliyyət göstərir.
ABŞ-də müxtəlif sahələrdə çalışan ombudsmanlar üzrə illik əməkhaqqı təxminən 76 min–167 min dollar diapazonunda göstərildikdə, aylıq hesabla bu 6 300–13 900 dollar, Azərbaycan manatı ilə isə təxminən 10 800–23 700 manat edir.
Fransa
Fransada Ombudsmana yaxın konstitusion institut olan "Hüquqların Müdafiəçisi”nə - Défenseur des droits - hazırda François-Noël Buffet rəhbərlik edir.
Bu vəzifə üzrə aylıq brüt gəlirin təxminən 15 min avro olduğu göstərilir. Bu isə təxminən 28 900 manat edir.
Şahanə Ziyad
